Halla Gunnarsdóttir hefur verið ráðin ráðgjafi forsætisráðherra. Hún hóf störf þann 1. mars síðastliðinn og mun hafa aðsetur í forsætisráðuneytinu. Þetta kemur fram í frétt ráðuneytisins.
Samkvæmt fréttinni mun Halla leiða starf stýrihóps um heildstæðar úrbætur að því er varðar kynferðislegt ofbeldi. Meginhlutverk hópsins er að beita sér fyrir framsæknum og samhæfðum aðgerðum stjórnvalda gegn kynferðislegu ofbeldi og kynferðislegri og kynbundinni áreitni og að Ísland sé í fremstu röð í baráttunni gegn hvers kyns kynbundnu ofbeldi.
„Halla hefur víðtæka reynslu af mannréttindamálum og baráttunni gegn kynbundnu ofbeldi og áreitni. Hún starfaði áður sem skrifstofustjóri hjá breska Kvennalistanum (The Women’s Equality Party) þar sem hún leiddi stefnumótun samtakanna. Þá starfaði Halla á alþjóðlegri lögmannsstofu í Lundúnum, McAllister-Olivarius, sem sérhæfir sig í málum sem lúta að kynbundinni áreitni á vinnustöðum, innan menntastofnana og á internetinu.
Á árunum 2009 til 2013 var Halla aðstoðarmaður Ögmundar Jónassonar, innanríkisráðherra og heilbrigðisráðherra, þar sem hún leiddi meðal annars samráð um meðferð nauðgunarmála og hafði frumkvæði að vitundarvakningu um kynferðislegt, andlegt og líkamlegt ofbeldi gegn börnum sem var skipulögð í samstarfi velferðarráðuneytis, innanríkisráðuneytis og mennta- og menningarmálaráðuneytis,“ segir í fréttinni.
Jafnframt kemur fram að Halla sé fyrrum blaðamaður og hafi verið virk í baráttunni gegn kynbundnu ofbeldi um langa hríð, þar á meðal á vettvangi Femínistafélags Íslands.
Eins og Kjarninn hefur fjallað um þá hafa aldrei fyrr verið jafn margir aðstoðarmenn eins og hjá núverandi ríkisstjórn. Aðeins Lilja Alfreðsdóttir mennta- og menningarmálaráðherra er með einn aðstoðarmann en allir hinir ráðherrarnir eru með tvo, eins og þeir hafa leyfi til.
Samkvæmt upplýsingum Kjarnans er Halla ekki ráðin inn í ráðuneytið sem aðstoðarmaður heldur ráðgjafi. Lögum um Stjórnarráð Íslands var breytt árið 2011 með þeim hætti að heimild til að fjölga aðstoðarmönnum ráðherra var útvíkkuð þannig að hver og einn þeirra má ráða tvo slíka. Auk þess var sett inn heimild fyrir ríkisstjórnina að ráða þrjá aðstoðarmenn til viðbótar ef þörf krefur. Hún hefur nú þegar ráðið sér tvo slíka, annars vegar Láru Björg Björnsdóttur upplýsingafulltrúa ríkisstjórnarinnar og hins vegar Unni Brá Konráðsdóttur sem mun leiða vinnu ríkisstjórnarinnar um breytingar á stjórnarskránni.
