Tólf sóttu um stöðu aðstoðarseðlabankastjóra

Fyrrverandi þingmaður er á meðal umsækjenda um stöðu aðstoðarseðlabankastjóra. Forsætisráðherra mun skipa í stöðuna.

Þórður Snær Júlíusson 23. mars 2018

Arnór Sighvatsson aðstoðarseðlabankastjóri hættir síðar á þessu ári.

Alls sóttu tólf um stöðu aðstoðarseðlabankastjóra sem auglýst var til umsóknar 21. febrúar síðastliðinn. Umsóknarfrestur rann út 19. mars. Á meðal þeirra sem sóttu um stöðuna er Vilhjálmur Bjarnason, fyrrverandi þingmaður Sjálfstæðisflokksins, Guðrún Johnsen, hagfræðingur og fyrrverandi stjórnarmaður í Arion banka, Konráð S. Guðjónsson, hagfræðingur Viðskiptaráðs, Ólafur Margeirsson hagfræðingur, Daníel Svavarsson, forstöðumaður Hagfræðideildar Landsbankans, Rannveig Sigurðardóttir, staðgengill aðalhagfræðings Seðlabanka Íslands og aðstoðarframkvæmdastjóri hagfræði og peningastefnu bankans, og Jón Þ. Sigurgeirsson, framkvæmdastjóri alþjóðasamskipta og skrifstofu bankastjóra hjá Seðlabanka Íslands. Þetta kemur fram í tilkynningu á vef forsætisráðuneytisins.

Arnór Sighvatsson hefur tvívegis verið skipaður aðstoðarseðlabankastjóri og má ekki sækja aftur um starfið samkvæmt lögum. Þegar starfið var auglýst kom fram að umsækjendur skyldu hafa lokið háskólaprófi í hagfræði eða tengdum greinum, og búa yfir víðtækri reynslu og þekkingu á fjármálastarfsemi og efnahags- og peningamálum. Þá var gerð krafa um stjórnunarhæfileika og hæfni í mannlegum samskiptum. Katrín Jakobsdóttir forsætisráðherra mun skipa í starfið. Fyrst mun hún skipa nefnd til að meta hæfi umsækjenda, en niðurstaða hæfnisnefndar verður ráðgefandi fyrir forsætisráðherra.

Umsækjendurnir um starfið eru:

Daníel Svavarsson, hagfræðingur.

Guðrún Johnsen, hagfræðingur.

Stefán Hjalti Garðarsson, reikni- og fjármálaverkfræðingur.

Jón Þ. Sigurgeirsson, viðskiptafræðingur.

Konráð S. Guðjónsson, hagfræðingur.

Ludvik Elíasson, hagfræðingur.

Ólafur Margeirsson, hagfræðingur.

Rannveig Sigurðardóttir, hagfræðingur.

Stefán Jóhann Stefánsson, hagfræðingur.

Tryggvi Guðmundsson, hagfræðingur.

Vilhjálmur Bjarnason, viðskiptafræðingur.

Þorsteinn Þorgeirsson, hagfræðingur.

Már Guðmundsson seðlabankastjóri hefur einnig verið skipaður tvívegis í sitt starf og mun láta af störfum í ágúst á næsta ári. Því verður nýr seðlabankastjóri skipaður árið 2019. Már sagði í viðtali við sjónvarpsþátt Kjarnans fyrr í mánuðinum að hann hlakkaði mjög til að hætta. Már sagði enn fremur að þótt nægt framboð sé af fólki sem telur sig geta orðið næsti seðlabankastjóri þá sé ekki víst að raunverulegt framboð af kandídötum í starfið sé mikið.

Við þurfum á þínu framlagi að halda

Þú getur tekið beinan þátt í að halda úti öflugum fjölmiðli.

Við sem vinnum á ritstjórn Kjarnans viljum hvetja þig til að vera með okkur í liði og leggja okkar góða fjölmiðli til mánaðarlegt framlag svo við getum haldið áfram að vinna fyrir lesendur, fyrir fólkið í landinu.

Kjarninn varð níu ára í sumar. Þegar hann hóf að taka við frjálsum framlögum þá varð slagorðið „Frjáls fjölmiðill fyrir andvirði kaffibolla“ til og lesendur voru hvattir til að leggja fram í það minnsta upphæð eins kaffibolla á mánuði.

Mikið vatn hefur runnið til sjávar á þeim níu árum sem Kjarninn hefur lifað. Í huga okkar á Kjarnanum hefur þörfin fyrir fjölmiðla sem veita raunverulegt aðhald og taka hlutverk sitt alvarlega aukist til muna.

Við trúum því að Kjarninn skipti máli fyrir samfélagið.

Við trúum því að sjálfstæð og vönduð blaðamennska skipti máli.

Ef þú trúir því sama þá endilega hugsaðu hvort Kjarninn er ekki allavega nokkurra kaffibolla virði á mánuði.

Vertu með okkur í liði. Þitt framlag skiptir máli.

Ritstjórn Kjarnans: Sunna Ósk Logadóttir, Þórður Snær Júlíusson, Erla María Markúsdóttir, Arnar Þór Ingólfsson, Eyrún Magnúsdóttir og Grétar Þór Sigurðsson.

Já takk, ég vil styrkja Kjarnann!

Orðafjöldi: 358 Færslan var síðast uppfærð: 23. mars 2018, kl. 13:59
Færslan birtist fyrst: 23. mars 2018, kl. 10:14

Fréttinni var breytt klukkan 13:38 eftir að uppfærð fréttatilkynning var birt á vef forsætisráðuneytisins. Breytingin felst í því að eitt nafn var fjarlægt af upphaflegum lista yfir umsækjendur og eru þeir því tólf.