Ríkisstjórnin ákvað að taka upp hagsmunaskráningu fyrir ráðuneytisstjóra í Stjórnarráði Íslands og aðstoðarmenn ráðherra á fundi sínum í morgun. Fyrst um sinn verður hagsmunaskráningin valkvæð þar sem skylda til skráningar þyrfti að eiga sér skýra lagastoð.
Þetta kemur fram í frétt forsætisráðuneytisins.
Hér er um tilraunaverkefni að ræða og ekki er gert ráð fyrir að upplýsingar sem verða til við þessa skráningu verði birtar opinberlega, segir í fréttinni. Tilgangurinn sé fyrst og fremst sá að efla vitund starfsmanna um mikilvægi þess að afstýra hagsmunaárekstrum og bjóða þeim ráðgjöf í vafatilvikum.
„Í nýlegri skýrslu GRECO er athygli íslenskra stjórnvalda vakin á því að ástæða kunni að vera til að láta hagsmunaskráningu ná til þessara starfsmanna með hliðsjón af eðli starfanna og nálægð við vald ráðherra.
Forsætisráðuneytið mun útbúa eyðublað fyrir ráðuneytisstjóra og aðstoðarmenn ráðherra vegna hagsmunaskráningar, sambærilegt því sem ráðherrar fylla út og bjóða þessum starfsmönnum að fylla þau út. Forsætisráðuneytið mun taka við útfylltum eyðublöðum, fara yfir upplýsingar og leiðbeina hlutaðeigandi um hvort þörf sé á ráðstöfunum vegna mögulegra hagsmunaárekstra,“ segir í fréttinni.
Jafnframt kemur fram að forsætisráðuneytið muni taka saman skýrslu um verkefnið og birta eigi síðar en 30. mars 2019. Í henni verði ekki persónugreinanlegar upplýsingar. Hagsmunaskráningarkerfi stjórnvalda sé nú í heild til endurskoðunar, meðal annars í ljósi ábendinga GRECO. Endurskoðunin lúti að því hverjum skuli skylt að skrá hagsmuni, hvort gera eigi ráð fyrir upplýsingagjöf og ráðgjöf í trúnaði í vissum tilvikum og hversu víðfeðm skráningarskyldan eigi að vera. Síðastefnda atriðið varði til dæmis skráningu skuldbindinga og hagsmuni maka og ólögráða barna viðkomandi.
