Bresk stjórn­völd greindu frá því í gær að þau vilji selja 7,7 pró­senta hlut í Royal Bank of Scotland. Seldir verða 925 milljón hlutir í bank­anum og er gert ráð fyrir að sölu­and­virðið muni nema allt að 2,6 millj­örðum punda sem jafn­gildir tæp­lega 365 millj­örðum króna miðað við núver­andi gengi.

Stjórn­ar­and­staðan í Bret­landi er ósátt við þessi áform, enda er sölu­verðið langt undir því sem það þarf að vera, ef breskir skatt­greið­endur eiga að fá pen­ing­inn til baka sem lagður var til bank­ans fyrir um ára­tug í fjár­málakrepp­unni.

Í við­tali við breska rík­is­út­varpið BBC segir John McDowell, sem fer fyrir skugga­ráðu­neytið breska Verka­manna­flokks­ins þegar kemur að fjár­mál­um, að það eigi alls ekki að selja þennan hlut í bank­an­um, allra síst á verði sem gerir það að verkum að breskir skatt­greið­endur tapa háum fjár­hæðum á því að hafa bjargað bank­an­um.

Efir söl­una mun breska ríkið eiga 62,4 pró­senta hlut í bank­an­um. 

Rekstur Royal Bank of Scotland hefur gengið illa und­an­far­inn ára­tug, en tap­rekstur hefur verið af rekstri bank­ans í níu ár af síð­ustu tíu. Í fyrra varð í fyrsta skipti hagn­aður af rekstr­in­um, frá því breska ríkið koma bank­anum til bjargar og þjóð­nýtti hann að mestu. Búist er við því að hagn­aður verði einnig á þessu ári.