Íbúðalánasjóður skoðar Heimavelli

Íbúðalánasjóður hefur lánað Heimavöllum milljarða á grundvelli þess, að um lánveitingar til óhagnaðardrifinnar starfsemi hafi verið að ræða.

Magnús Halldórsson 7. júní 2018

Lánveitingar Íbúðalánasjóðs (ÍLS) til félags sem átti að vera með óhagnaðardrifna leigustarfsemi var til skoðunar hjá Fjármálaeftirlitinu (FME) í fyrra. Eftirlitið gerði athugasemdir við útlán Íbúðalánasjóðs til óhagnaðardrifinna leigufélaga vegna þess að þau hafi í raun verið rekin í hagnaðarskyni.

Frá þessu var greint í fréttum RÚV í kvöld.

Þar kemur einnig fram að félagið Heimavellir séu til sérstakrar skoðunar hjá Íbúðalánasjóði eftir skráningu þess á markað í síðasta mánuði, en líkt og Kjarninn hefur fjallað um þá er stór hluti af fjármögnun félagsins komin frá Íbúðalánasjóði í gegnum lán sem ætluð eru leigufélögum með óhagnaðadrifna starfsemi.

Anna Guðmunda Ingvarsdóttir segir í viðtali við RÚV, að Íbúðalánasjóður starfi eftir þeim ramma sem lög og reglur setja. Nú sé sérstaklega verið að skoða fjármögnun sem sjóðurinn hefur veitt Heimavöllum en eins og Íbúðalánasjóður hefur samtals lánað 18,4 milljarða króna til kaupa eða bygginga á 1.325 íbúðum á grundvelli reglugerðar sem ætlað er að tryggja að lánveitingarnar fari einungis til aðila sem ekki eru reknir í hagnaðarskyni.

Þar af eru um tólf milljarðar króna lán til hlutafélaga eða einkahlutafélaga. Um átta milljarðar króna af þeirri upphæð eru lán til Heimavalla, stærsta leigufélags landsins sem starfar á almennum markaði. Því eru 43,4 prósent allra útistandandi lána Íbúðalánasjóðs sem veitt hafa verið í samræmi við skilyrði reglugerðarinnar til Heimavalla. Alls skuldar félagið Íbúðalánasjóði 18,6 milljarða króna, en hluti þeirra lána eru svokölluð almenn leiguíbúðarlán sem um gilda mun rýmri reglur.

Heimavellir voru skráðir á markað í síðasta mánuði og stefna að því að endurfjármagna lánin frá Íbúðalánasjóði svo félagið geti losnað undan þeim kvöðum sem þau setja um að þiggjendur lánanna megi ekki greiða út arð.

Reglugerð 1042/2013 snýst um að Íbúðalánasjóður, sem er í eigu ríkisins, veiti lán til sveitarfélaga, félaga og félagasamtaka sem ætlaðar eru til byggingar eða kaupa á leiguíbúðum. Markmið reglugerðarinnar var að „stuðla að framboði á leiguíbúðum fyrir almenning á viðráðanlegum kjörum“.

Samkvæmt upplýsingum frá Íbúðalánasjóði hefur hann lánað til alls 25 félaga og félagasamtaka á grundvelli heimildarinnar. Þar af er eitt hlutafélag, 17 einkahlutafélög, þrjár sjálfseignarstofnanir, tvö húsnæðissamvinnufélög, eitt byggðasamlag og ein félagasamtök.

Heimavellir er með nokkuð stóran efnahag, en heildareignir þess nema tæplega 56 milljörðum króna, og nam eigið fé félagsins 17,6 milljörðum króna í lok árs í fyrra.

Við þurfum á þínu framlagi að halda

Þú getur tekið beinan þátt í að halda úti öflugum fjölmiðli.

Við sem vinnum á ritstjórn Kjarnans viljum hvetja þig til að vera með okkur í liði og leggja okkar góða fjölmiðli til mánaðarlegt framlag svo við getum haldið áfram að vinna fyrir lesendur, fyrir fólkið í landinu.

Kjarninn varð níu ára í sumar. Þegar hann hóf að taka við frjálsum framlögum þá varð slagorðið „Frjáls fjölmiðill fyrir andvirði kaffibolla“ til og lesendur voru hvattir til að leggja fram í það minnsta upphæð eins kaffibolla á mánuði.

Mikið vatn hefur runnið til sjávar á þeim níu árum sem Kjarninn hefur lifað. Í huga okkar á Kjarnanum hefur þörfin fyrir fjölmiðla sem veita raunverulegt aðhald og taka hlutverk sitt alvarlega aukist til muna.

Við trúum því að Kjarninn skipti máli fyrir samfélagið.

Við trúum því að sjálfstæð og vönduð blaðamennska skipti máli.

Ef þú trúir því sama þá endilega hugsaðu hvort Kjarninn er ekki allavega nokkurra kaffibolla virði á mánuði.

Vertu með okkur í liði. Þitt framlag skiptir máli.

Ritstjórn Kjarnans: Sunna Ósk Logadóttir, Þórður Snær Júlíusson, Erla María Markúsdóttir, Arnar Þór Ingólfsson, Eyrún Magnúsdóttir og Grétar Þór Sigurðsson.

Já takk, ég vil styrkja Kjarnann!

Orðafjöldi: 449 Færslan var síðast uppfærð: 8. júní 2018, kl. 8:48
Færslan birtist fyrst: 7. júní 2018, kl. 20:25

Fréttinni hefur verið breytt eftir ábendingar um að athugasemdir Fjármálaeftirlitsins við útlánastarfsemi Íbúðalánasjóðs hafi verið settar fram í fyrra, en séu ekki ný til komnar líkt og mátti skilja á fyrirsögn. Þá hefur verið gerður skýrari greinarmunur á þeirri athugun á úttekt Fjármálaeftirlitsins sem fór fram í fyrra og skoðun Íbúðalánasjóðs á lánum til hagnaðardrifinna leigufélaga vegna hækkunar á leigu, sem stendur nú yfir.