Á und­an­förnum tólf mán­uðum hefur Jeff Bezos, for­stjóri og stofn­andi Amazon, aukið virði eigna sinna um 60 millj­arða Banda­ríkja­dala, eða sem nemur um 6.360 millj­arða króna. Á mán­uði nemur það um 530 millj­örðum króna, og í þrjá­tíu daga mán­uði eru það um 17,6 millj­arðar á hverjum degi vik­unn­ar.

Þetta svipar því að Bezos bæti við sig mark­aðsvirði alls hluta­fjár sem skráð er á markað á Íslandi, á sex vikna frest­i. 

Aldrei í sög­unni hafa eignir eins manns auk­ist jafn mikið og hratt, og er Bezos nú lang­sam­lega rík­asti maður heims­ins, sam­kvæmt lista For­bes tíma­rits­ins, en eignir hans nema nú um 145 millj­örðum Banda­ríkja­dala, eða sem nemur um 15.370 millj­örðum króna. Þar munar mest um 17 pró­sent hlut í Amazon, en verð­mið­inn á því fyr­ir­tæki nemur nú um 820 millj­örðum Banda­ríkja­dala, eða sem nemur um 90 þús­und millj­örðum króna. 

Á einu ári hefur mark­aðsvirði Amazon auk­ist um 350 millj­arða Banda­ríkja­dala, eða sem nemur um 37 þús­und millj­örðum króna.

Aðeins Apple er verð­meira, en verð­miði þess er nú 944 millj­arða Banda­ríkja­dala, eða sem nemur um 100 þús­und millj­örðum króna. 

Bezos er einnig eig­andi Was­hington Post og geim­ferð­ar- og rann­sókn­ar­fyr­ir­tæk­is­ins Blue Orig­in.