Með­al­aldur starfs­fólks við kennslu í grunn­skólum hefur farið hækk­andi frá árinu 2000. Haustið 2000 var hann 42,2 ár en haustið 2017 46,7 ár. Á sama tíma­bili hefur með­al­aldur kenn­ara með rétt­indi hækkað um rúm fjögur ár, í 47,7 ár. Með­al­aldur starfs­fólks við kennslu án rétt­inda var tölu­vert lægri en rétt­inda­kenn­ara og hefur svo verið á öllu tíma­bil­inu og var 35,9 ár haustið 2017.

Þetta kemur fram í frétt Hag­stof­unnar í dag. 

Jafn­framt segir að færri karlar og fleiri konur séu við kennslu en fyrir 20 árum. Frá skóla­ár­inu 1998 til 1999 hefur starfs­fólki við kennslu fjölgað úr rúm­lega fjögur þús­und í rúm­lega fimm þús­und haustið 2017. Karlar við kennslu voru rúm­lega 900 haustið 2017 og hafði fækkað úr tæp­lega 1.100 haustið 1998. Á sama tíma hefur konum fjölgað úr tæp­lega þremur þús­undum í rúm­lega 4.200 haustið 2017.

Kenn­urum án kennslu­rétt­inda fjölgar

Á árunum 1998 til 2008 var hlut­fall starfs­fólks án kennslu­rétt­inda við kennslu í grunn­skólum lands­ins á bil­inu 13 til 20 pró­sent. Hag­stofan greinir frá að eftir efna­hags­hrunið hafi rétt­inda­lausum kenn­urum fækkað og fór hlut­fall þeirra lægst í 4,1 pró­sent haustið 2012. 

Síðan 2012 hefur kenn­urum án kennslu­rétt­inda fjölgað ár frá ári og voru 8,6 pró­sent af 5.140 starfs­mönnum við kennslu haustið 2017. Þá voru 443 starfs­menn við kennslu án kennslu­rétt­inda og hafði fjölgað úr 272 frá hausti 2016.

Nem­endum í grunn­skólum fjölgar

Nem­endur í grunn­skólum á Íslandi voru 45.195 haustið 2017 og hafa aldrei verið fleiri. Þeim fjölg­aði um 668, eða 1,5 pró­sent, frá fyrra ári.

Alls störf­uðu 169 grunn­skólar á land­inu skóla­árið 2017 til 2018, einum færri en árið áður. Einka­skólar voru 12 tals­ins með rúm­lega 1.100 nem­endur og eru nem­endur í fimm ára leik­skóla­deildum und­an­skild­ir. Í sér­skól­um, sem voru þrír tals­ins, stund­uðu 172 nem­endur nám, lítið eitt fleiri en und­an­farin ár.

Enn fremur kemur fram í frétt­inni að nem­endum sem hafa erlent tungu­mál að móð­ur­máli hafi fjölgað ár frá ári frá því að Hag­stofan hóf að safna inn þeim upp­lýs­ing­um. Haustið 2017 höfðu 4.470 grunn­skóla­nem­endur erlent tungu­mál að móð­ur­máli, eða 9,9 pró­sent nem­enda, sem er fjölgun um rúm­lega 300 nem­endur frá árinu áður. Ein­hverjir þess­ara nem­enda hafa einnig íslensku sem móð­ur­mál.