Öllu fleiri Íslendingar 18 ára og eldri eru hlynntir Borgarlínunni en andvígir. Þetta kemur fram í nýrri könnun Maskínu. Um 45 prósent eru hlynnt Borgarlínunni en hátt í 28 prósent andvíg. Þá eru tæplega 27 prósent í meðallagi hlynnt eða andvíg Borgarlínunni.
Ungt fólk er hlynntara en eldra. Svarendur á aldrinum 18-39 ára eru hlynntastir en þeir sem eru 50-59 ára eru andvígastir Borgarlínunni. Íbúar höfuðborgarsvæðisins eru jafnframt hlynntari Borgarlínu en aðrir Íslendingar. Milli 53 og 54 prósent Reykvíkinga eru hlynnt henni og naumlega 26 prósent andvíg.
Íbúar nágrannasveitafélaga Reykjavíkur eru ekki jafn hlynntir Borgarlínunni en þó segjast um 43 prósent þeirra hlynnt en rúmlega 28 prósent andvíg.
Þeirsem hafa háskólapróf eru talsvert hlynntari Borgarlínunni en þeir sem hafa grunnmenntun og framhaldsskóla- eða iðnmenntun. Um 56 prósent háskólamenntaðra eru hlynnt henni, en aðeins um 34 prósent grunnskólamenntaðra og 36 prósent framhalds- eða iðnmenntaðra.
Afstaða til Borgarlínunnar er afar breytileg eftir stjórnmálaskoðun. Um 8-17 prósent þeirra sem myndu kjósa Sjálfstæðisflokk, Framsóknarflokk, Miðflokk og Flokk fólksins eru hlynnt henni á móti um 69-81 prósent kjósenda Vinstri grænna, Samfylkingarinnar, Pírata og Viðreisnar.
Sama spurning var lögð fyrir Þjóðgátt Maskínu í janúar síðastliðinn. Nokkur breyting hefur orðið á viðhorfi Íslendinga á Borgarlínu síðan þá, en 53 prósent voru hlynnt henni í janúar, samanborið við 45 prósent nú í júní. Fleiri eru nú andvígir eða segjast í meðallagi hlynntir/andvígir Borgarlínunni en í janúar. Viðhorf kvenna hefur breyst töluvert, auk þess sem íbúar höfuðborgarsvæðisins eru ekki eins hlynntir Borgarlínunni og í janúar. Mesta breytingin varð þó á viðhorfi íbúa Vesturlands og Vestfjarða, auk Suðurlands og Reykjaness, þar sem færri eru nú hlynntir Borgarlínunni en í janúar.
Viðhorf nokkurra kjósendahópa hefur breyst mikið síðan síðasta mæling fór fram, en hlutfall andvígra meðal kjósenda Flokks fólksins, Miðflokksins, Framsóknarflokksins og Sjálfstæðisflokksins hefur hækkað mikið og nú er meirihluti allra þessara kjósendahópa andvígur Borgarlínunni. Fleiri kjósendur Viðreisnar eru nú hlynntir Borgarlínunni en í janúar.
Af þeim sem búa á höfuðborgarsvæðinu eru íbúar miðborgarinnar, Vesturbæjar og Seltjarnarness ásamt þeim sem búa í Hlíðum, Laugardal, Háaleiti og Bústöðum hlynntastir Borgarlínunni, eða yfir 58 prósent. Hafnfirðingar og Kópavogsbúar hafa svipað viðhorf til Borgarlínu en sveitarfélagið Garðabær sker sig úr hvað viðhorf til hennar varðar, því þar eru fleiri andvígir en hlynntir.
