John McCain, öld­ung­ar­deild­ar­þing­maður Repúblik­ana í Banda­ríkj­un­um, lést í nótt, 81 árs að aldri, á heim­ili sínu í Arizona. Bana­meinið var krabba­mein, en stutt er síðan fjöl­skylda hans sendi frá sér til­kynn­ingu þar sem fram kom að McCain væri dauð­vona og hefði hætt krabba­meins­með­ferð. 

McCain var oft nefndur sá hug­rakki, en hann var tek­inn höndum í Víetnam­stríð­inu, árið 1967, og þurfti að þola pynt­ing­ar. Hann snéri heim til Banda­ríkj­anna sem þjóð­hetja og þótti sýna fádæma hug­rekki í þeim aðstæðum sem hann þurfti að þola. 

McCain hóf fljót­lega að byggja upp stjórn­mála­feril sinn og var kos­inn á þing í full­trúa­deild­ina fyrir 35 árum, 1983. Hann var í tvö kjör­tíma­bil í henni en var sam­tals kos­inn sex sinnum í öld­unga­deild­ina. 

Hann var alla tíð tengdur hags­mun her­manna, ekki síst upp­gjaf­ar­her­manna og stóru sam­fé­lagi fjöl­skyldu­með­lima her­manna um öll Banda­rík­in. Hann var stundum sagður hugsa fyrst um her­inn og síðan þjóð­ina.

Í tvígang vildi hann verða for­seti Banda­ríkj­anna. Fyrst fyrir kosn­ing­arnar árið 2000 en þá atti hann kappi við George W. Bush, í for­vali Repúblikana­flokks­ins, en tap­að­i. 

Árið 2008 fór hann síðan aftur fram, og var útnefndur full­trúi Repúblik­ana. Hann tap­aði í kosn­ing­unum það ár gegn Barack Obama, en síðar á ferl­inum urðu þeir tveir miklir vin­ir, og hélst sú vin­átta fram á dauða­dag. Obama segir McCain hafa átt fá sína líka. Hann hafi verið heið­ar­leg­ur, umfram allt, og hug­rekki hans muni aldrei gleym­ast.

McCain hefur í seinni tíð verið þekktur fyrir sjálf­stæði sitt og ein­arða afstöðu í mörgum mál­um, og má þar nefna and­stöðu hans við afnám heil­brigð­is­kerf­is­ins Obamacare, sem var eitt helsta bar­áttu­mál Don­alds Trumps, Banda­ríkja­for­seta. McCain var mik­ill and­stæð­ingur hans.