Losun frá flugi til og frá Íslandi jókst líkt og fyrri ár milli ára. Aukn­ing los­unar var 13,2 pró­sent milli áranna 2016 og 2017. Árið 2016 var los­unin 718.624 tonn af CO2 en varð á síð­asta ári 813.745 tonn af CO2.

Þetta kemur fram í frétt Umhverf­is­stofn­unar sem birt­ist í dag en upp­gjöri rekstr­ar­að­ila stað­bund­ins iðn­aðar og flug­rek­enda í við­skipta­kerfi ESB með los­un­ar­heim­ildir er lok­ið.

Alls gerðu fimm íslenskir flug­rek­endur og sjö rekstr­ar­að­ilar iðn­aðar upp heim­ildir sín­ar. Heild­ar­losun í flugi sem fellur undir kerfið var 813.745 tonn CO2 ígilda en í iðn­aði var los­unin 1.831.667 tonn af CO2 ígild­um.

Þeim flug­rek­endum sem bar skylda til að gera upp losun sína fækk­aði um einn, sam­kvæmt Umhverf­is­stofn­un, og eru nú fimm. „Losun frá flugi er þó háð tak­mörk­unum að því leyt­inu til að hún er ein­ungis losun innan EES svæð­is­ins og tekur því ekki á heild­ar­losun flestra flug­rek­enda, þar sem t.d. Amer­íkuflug er ekki innan gild­is­sviðs kerf­is­ins eins og er,“ segir í frétt­inn­i. 

Losun í iðn­aði jókst lít­il­lega

Los­unin í iðn­aði jókst lít­il­lega á milli ára, eða um 2,8 pró­sent, úr 1.780.965 tonnum af CO2 árið 2016 í 1.831.667 tonn af CO2 árið 2017. Jafn­margir rekstr­ar­að­ilar í iðn­aði gerðu upp fyrir árið 2017 og árið á und­an, eða sjö tals­ins, sam­kvæmt Umhverf­is­stofn­un.