Benedikt Jóhannesson, fyrrverandi fjármálaráðherra og formaður Viðreisnar, segir í stöðuuppfærslu á Facebook að Davíð Oddsson ritstjóri Morgunblaðsins, fyrrverandi forsætisráðherra og formaður Sjálfstæðisflokksins, sé gamall kall sem sleiki botninn á mykjuhaugi.
Vísar Benedikt þar í Staksteina blaðsins í dag þar sem endurbirtur er pistill Halldórs Jónssonar, verkfræðings og áhrifamanns í Sjálfstæðisflokknum, sem hann birti á Moggabloggi sínu og kallar „Dömufrí“.
Þar vísar Halldór í áskanir á hendur Brett Kavanough dómaefnis Trump vestanhafs um kynferðisofbeldi, og ber þær saman við hvernig hann sjálfur reyndi að vingast við stúlkur á dansæfingum í Menntaskólanum í Reykjavík á sínum tíma.
„Þegar ég hugsa til baka hvernig maður hegðaði sér á dansæfingum í MR. Búinn að tendra sig upp á brennivíni og Camelsmóki bauð maður stelpunum upp og reyndi allt til að vanga þær og trukka og helst að komast í sleik,“ segir Halldór í pistli sínum og bætir við. „Þessi hegðun myndi koma í veg fyrir að ég yrði samþykktur í embætti ef Trump myndi vilja hygla mér eins og Kawanough eða hvernig það er stafað. Sá kall hegðaði sér eitthvað svona á menntaskólaböllum fyrir einum þrjátíu árum. Nú ætla demókratarnir að nota það til að hindra að þessi dóni komist í Hæstarétt Bandaríkjanna.“
Kjarninn fjallaði um ásakanirnar á hendur Kavanaugh hér.
„Ef bara hefðu verið dömufrí í MR í gamla daga hefði mér líklega sjaldnar verið boðið upp en þeim myndarlegri. Fyrir bragðið hefði ég líklega minna á samviskunni varðandi mögulegt embættisgengi og færri stelpur hefði talið sig geta hankað mig á einhverju, þó svo að ég hafi ekki orðið var við mikla mótspyrnu þeirra á þeim tíma .En kannski hef ég bara fattað þetta vitlaust eins og þeir í Orkuveitunni. „Ef bara konur mættu hafa kynferðislegt frumkvæði í formi almenns dömufrís en ekki þessir ólaungröðu kallar sem vaða allstaðar uppi, bæði prelátar, paragraffistar og pólitíkusar, þá yrðu kannski færri vandræði en nú ríða allstaðar húsum,“ skrifar Halldór í færslu sinni sem Morgunblaðið birtir undir titlinum „Samfélag heilagra“.
Benedikt segir að sér verði óglatt af því að lesa þetta. „ Tveir ógeðslegir gamlir karlar sleikja botninn á mykjuhaugnum, annar með því að halda að það sé sniðugt að skrifa svona, hinn með því að halda að það sé sniðugt að birta svona skrif.“
