Verðið á tunn­unni af hrá­olíu fór í gær upp fyrir 81 Banda­ríkja­dal og hefur ekki verið hærra í fjögur ár. Á und­an­förnum tveimur vikum hefur það hækkað um tíu pró­sent og það sem af er ári um meira en 45 pró­sent.

Fast­lega er búist við að verðið muni jafn­vel hækka upp í þær hæðir sem það var í árið 2014, áður en það tók snögga dýfu niður á við. Þá fór það úr 110 Banda­ríkja­dölum á tunn­una niður í 25 Banda­ríkja­dali á ríf­lega einu og hálfu ári.

Fyrir Ísland er mikil hækkun olíu­verðs ekki góð tíð­indi. Fyrir flug­fé­lög­in, WOW Air og Icelanda­ir, er hækk­unin sér­lega íþyngj­andi, í krefj­andi rekstr­ar­um­hverfi, og það sama á við um útgerð­ar­fyr­ir­tæk­in. Almennt á litið þá er hátt verð á olíu ekki gott fyrir Ísland, þar sem það hefur afleidd áhrif á verð­lag og ýtir jafnan undir verð­bólgu­þrýst­ing vegna hærra verðs á inn­fluttum vör­um.

Ein ástæða þess að verðið hefur hækkað eru við­skipta­þving­anir gagn­vart Íran, að því er fram kemur í umfjöllun breska rík­is­út­varps­ins BBC. Fram­boðið hefur dreg­ist saman á sama tíma og eft­ir­spurn hefur auk­ist. Það hefur ýtt verð­inu upp á við.

Don­ald Trump Banda­ríkja­for­seti, sem beitti sér sér­stak­lega fyrir við­skipta­þving­unum gagn­vart Íran, hefur kallað eftir því að sam­tök olíu­fram­leiðslu­ríkja (OPEC) taki ákvörðun um að auka fram­leiðslu stór­kost­lega með það að mark­miði að lækka olíu­verð­ið. Hann sagði í tísti á Twitter aðgangi sín­um, 20. sept­em­ber, að Banda­ríkin legðu sitt af mörkum við að tryggja öryggi mið­aust­ur­landa en þau beittu sér aðeins fyrir því að hækka olíu­verð­ið. Hann bætti svo við, að þessu myndu Banda­ríkin ekki gleyma.