Ríki sem ger­ast aðilar að alþjóða­stofn­unum og alþjóða­samn­ingum gera það á grund­velli full­veldis þeirra, en skerða það ekki eða afsala sér því. 

Þetta sagði Bjarni Már Magn­ús­son, dós­ent við laga­deild Háskól­ans í Reykja­vík, í við­tali við RÚV í kvöld. Bjarni Már fjall­aði um þessi mál á ráð­stefnu um full­veldi og þjóðar­ör­yggi í Hörpu, sem fram fór í gær. 

Þessi sjón­ar­mið hafa verið nokkuð til umræðu að und­an­förnu í tengslum við hinn svo­nefnda þriðja orku­pakka, sem fjallað var ítar­lega um á vef Kjarn­ans í gær. Málið er umdeilt, ekki síst innan Sjálf­stæð­is­flokks­ins, þar sem stór hópur flokks­manna hefur áhyggjur af því að for­ræði Íslands yfir orku­auð­lindum lands­ins fari smám saman til Brus­sel með því að sam­þykkja orku­pakk­ann.

Rík­is­stjórnin hefur nú þegar frestað sam­þykkt hans fram á vor, en með honum er meg­in­at­riðið það að koma á sam­ræmdu eft­ir­liti og reglu­verki með orku­geir­anum á innri mark­aði Evr­ópu­sam­bands­ins. 

Ísland hefur þá sér­stöðu að tengj­ast ekki orku­mark­aðnum í Evr­ópu, líkt og til dæmis Nor­eg­ur, sem selur raf­orku til Evr­ópu um sæstreng. 

Aðspurður hvers vegna þessi sjón­ar­mið séu áber­andi í umræð­unni, um að full­veld­is­af­sala felist í þriðja orku­pakk­an­um, sagði hann: „Þetta er svona hugs­un­ar­háttur eins og full­veldið sé kaka, svona full­veld­iskaka, ­sem er hægt að sneiða niður í búta og þá bara hverfur full­veld­ið. Eins og kaka sem fer niður í munn fólks og bara hverf­ur.“