Lilja Alfreðsdóttir menntamálaráðherra vill breyta námsfyrirkomulaginu í kennaranámi þannig að starfsnám kennara á fimmta ári verði launað. Ásamt því vill hún að Lánasjóður íslenskra námsmanna veiti kennaranemum sérstaka styrki. Lilja segir að kennaraskortur blasi við ef ekkert verður gert og hugmyndin sé því að það verði fjárhagslegur hvati úr Lánasjóðnum í afmarkaðan tíma til þess að auka aðsóknina í námið. Frá þessu er greint í Fréttablaðinuí dag.
Horfa fram á kennaraskort
Lilja segir að rótækra aðgerða sé þörf til auka aðsókn í kennaranám og til að bæta starfsumhevrfi kennara. Hún stefnir á að lagafrumvarp um efnið verði klárt næsta haust en hugmyndin er að veita kennaranemum styrki úr LÍN með það að markmiði að til verði fjárhagslegur hvati í afmarkaðan tíma til að auka aðsókn í kennaranámið. Hún segir að aðsókn í kennaranám hafi farið minnkandi og þótt það megi sjá vísbendingar um smávægilega aukningu í námið í vorönn í fyrra þá segir Lilja ljóst að fjöldi kennara sé ekki nægur til þess að mæta nýliðun á öllum skólastigum. „Auk þess er brottfall úr náminu mikið og námsframvinda kennaranema hæg. Við erum að horfa fram á kennaraskort og það er grafalvarlegt mál,“ segir Lilja.
Í umfjöllun Fréttablaðsins segir frá því að samkvæmt ársskýrslu undanþágunefndar grunnskóla skólaárið 2017 til 2018 voru 434 umsóknir um undanþágu til þess að kenna í grunnskólum án tilskilinna leyfa teknar til afgreiðslu nefndarinnar. Þá er meðalaldur starfandi kennara hár og útlit fyrir að margir reynslumiklir kennarar muni brátt hverfa frá kennslu vegna aldurs.
Þarf ekki fela í sér mismunun gagnvart nemendum í öðrum greinum.
Aðspurð segir Lilja aðgerðina ekki endilega þurfa að fela í sér mismunun gagnvart nemendum í öðrum greinum. Hún segir að í Noregi sé svipað fyrirkomulag um kennaranámið og mælst vel fyrir. Ásamt því hafur Lilja skipað aðgerðahóp sem vinnur að því að bæta starfsumhverfi kennara almennt.
