Aldís Schram, dóttir Jóns Baldvins Hannibalssonar fyrrverandi ráðherra og sendiherra, segir föður sinn hafa nýtt bréfsefni sendiráðs Íslands í Washington þegar hann óskaði eftir því að hún yrði nauðungarvistuð á geðdeild. Með því hafi hann misnotað stöðu sína sem sendiherra til þess að reka persónuleg erindi. Frá þessu greinir Aldís í Morgunútvarpinu á Rás 2 í morgun.
Jón Baldvin var utanríkisráðherra árin 1988 til 1995 og sendiherra í Bandaríkjunum 1998 til 2002 og í Finnlandi 2002 til 2005. Fjórar konur greindu nýverið frá meintri kynferðislegri áreitni Jóns Baldvins í Stundinni. Elstu sögurnar eru frá sjöunda áratug síðustu aldar en sú nýjasta frá því síðasta sumar. Þá hefur fjöldi kvenna gengið í #metoo hóp á Facebook þar sem frekari sögur af kynferðisbrotum hans og ósæmilegri háttsemi hafa komið fram.
Aldís segist hafa gengið á föður sinn árið 1992 vegna kynferðisbrota eftir að gömul skólasystir hennar hafði sagt Aldísi frá því að hún hefði vaknað við að Jón Baldvin væri að áreita hana kynferðislega. Aldís telur að sá fundur hafi orðið til þess að hún var í fyrsta sinn nauðungarvistuð á geðdeild.
Gat hringt í lögregluna til að handtaka hana
Aldís segir að eftir þetta hafi hann getað hringt í lögreglu hvenær sem er til að handtaka hana. „Umsvifalaust er ég í járnum farið með mig upp á geðdeild, ég fæ ekki viðtal og það er skrautlegt að lesa þessar yfirlýsingar geðlækna. Það er um einhverjar ímyndanir mínar og ranghugmyndir sem ég er með þegar ég er reið út í föður minn,“ segir hún.
Hún segir enn fremur að Jón Baldvin hafi getað sem ráðherra og síðar sendiherra sent bréf til dómsmálaráðuneytisins til þess að hún yrði nauðungarvistuð.
Hún talar jafnframt um atvik sem átti sér stað árið 1998 en þá hafi lögregla brotið sér leið inn á heimili hennar ásamt lækni og ættingja hennar, að því er virðist að nauðsynjalausu, enda yfirgáfu læknir og lögregla húsnæðið samkvæmt sömu lögregluskýrslu. „En viti menn, sem ég vissi ekki fyrr en ég las lögreglugögn, að aðferð þessi kallast aðstoð við erlent sendiráð, samkvæmt lögreglugögnum,“ segir Aldís.
