Tæplega 80 prósent félagsmanna stéttarfélagsins Eflingar telja kröfugerð félagsins í kjarasamningum sanngjarna, samkvæmt nýrri könnun Gallup. Sama hlutfall segist hlynnt því að fara í verkfall til að knýja fram launakröfur verkalýðsfélaganna. Í tilkynningu frá Eflingu segir að það sé ekki síst erlendur hluti vinnuaflsins sem að fylkir sér bak við launakröfurnar en samkvæmt niðurstöðum könnunarinnar hefur stuðningur við kröfur og verkfallsaðgerðir auk væntinga um launahækkanir í kjölfar kjarasamninga tilhneigingu til að vera meiri meðal félaga af erlendum uppruna.
Mikil aukning á fjárhagsáhyggjum
Könnun leiðir einnig í ljós mikla aukningu á fjárhagsáhyggjum meðal félagsmanna eða um 16 prósent aukningu frá launakönnun sem framkvæmd var í ágúst síðastliðnum. Meðal svarenda voru 47 prósent sem sögðust hafa miklar eða mjög miklar fjárhagsáhyggjur í kjarakönnun í ágúst 2018. Aftur á móti segjast talsvert fleiri eða 63 prósent hafa miklar eða mjög miklar áhyggjur í könnuninni sem framkvæmt var í janúar 2019. Það eru mestu fjárhagsáhyggjur sem hafa mælst í könnunum Eflingar frá hruni, samkvæmt félaginu.
Spurningarnar voru lagðar fyrir fullvinnandi félagsmenn Eflingar með netkönnun á tímabilinu 19. til 26. janúar 2019. Haft var samband við 4758 félagsmenn og þar af svöruðu 1350. Niðurstöður voru vigtaðar út frá atvinnugrein og uppruna.
