Stjórn VR hefur birt opið bréf til Kviku banka á vefsíðu sinni. Í því kemur fram að í ljósi þess að fjármálafyrirtækið Gamma sé í eigu Kviku banka – og stýri Almenna leigufélaginu – beina þau orðum sínum til stjórnenda Kviku banka.
„VR hafa borist gögn með samskiptum Almenna leigufélagsins við nokkra leigjendur sína þar sem enn á ný er án fyrirvara, eða nokkurra haldbærra raka, krafist tugþúsunda hækkunar leigu og leigjendum settir þeir afarkostir að samþykkja hækkunina ellegar vera hent á götuna án húsaskjóls. Umhugsunarfrestur sem leigjendum er gefinn til að samþykkja eða hafna tilboðinu er einungis fjórir dagar. Ljóst er að tugþúsunda hækkun á leigu gerir væntar hækkanir sem VR er nú að semja um við Samtök atvinnulífsins að engu,“ segir í bréfinu.
Stjórnin telur að varla sé hægt að lýsa þessu með öðrum orðum en sem grimmd, taumlausri græðgi og mannvonsku.
Sætta sig ekki við ástandið
„Stjórn VR sættir sig ekki við þetta. Við kjósum að láta ekki bendla okkur við aðila sem beita slíkum meðulum og höfum tekið þá ákvörðun að veita Kviku banka fjögurra daga frest til þess að láta Almenna leigufélagið hætta þessum grimmdarverkum og koma því þannig fyrir að leiga félagsins hækki ekki umfram verðlag og að leigjendum verði tryggt húsnæðisöryggi. Hafi það ekki verið gert innan fjögra daga mun VR taka allt sitt fé úr eignastýringu hjá Kviku banka sem er um 4,2 milljarðar króna,“ segir í opna bréfinu.
Með bréfinu er tekið dæmi um póst frá Almenna leigufélaginu til leigjanda sem sendur var fjórum dögum fyrir 5. febrúar.
„Góðan dag, Nú líður að lokum leigusamnings þíns um íbúðarhúsnæði við xxxxxx nr. xx, 108 - Reykjavík og langar okkur því að bjóða þér að endurnýja hann. Samningurinn rennur út þann 31.03.2019. Við getum boðið þér tveggja ára leigusamning á kr. xxx.xxx,- á mánuði. Vinsamlegast staðfestu endurnýjun fyrir þriðjudaginn 5. febrúar með því að svara þessum pósti. Við biðjum þig jafnframt um að láta okkur vita viljir þú ekki endurnýja samninginn.
Endilega vertu í sambandi við okkur sem fyrst með hvað þú hyggst gera.“
