Icelandair Group hefur ákveðið að taka Boeing 737 MAX 8 flug­vélar sínar úr rekstri um óákveð­inn tíma. Félagið er með þrjár slíkar vélar í rekstri. ­Fé­lagið fylgist náið með þróun mála og vinnur áfram með flug­mála­yf­ir­völdum á Íslandi, í Evr­ópu og Banda­ríkj­unum varð­andi næstu skref. 

„Miðað við þær upp­lýs­ingar sem liggja fyr­ir, þá örygg­is­ferla sem félagið fylgir, sem og þjálfun áhafna þess, telur félagið vél­arnar örugg­ar. Til skamms tíma mun þessi ráð­stöfun hafa óveru­leg áhrif á rekstur félags­ins þar sem aðeins er um 3 vélar að ræða af 33 far­þega­vélum í flota félags­ins og því hefur félagið svig­rúm til að bregð­ast við á næstu vik­um,“ segir í til­kynn­ing­inn­i. 

Bretar banna ferðir flug­vél­anna um loft­helgi sína

Flug­mála­yf­ir­völd í Bret­landi bönn­uðu í dag þotum af gerð­inni Boeing 737 MAX 8 að lenda og taka á loft frá flug­völlum í land­inu. Bretar eru fyrstir Evr­ópu­þjóða til að banna ferðir flug­véla af þess­ari gerð um loft­helgi sína. Norska flug­fé­lagið Norweg­ian hefur einnig kyrr­sett allar sínar vél­ar, að því er til­kynnt var síð­degis og birt­ist í frétt RÚV um mál­ið. 

Umferð flug­véla af þess­ari gerð hefur áður verið bönnuð í Kína, Suð­ur­-Afr­íku, Singapúr, Indónesíu, Ástr­al­íu, Bras­ilíu og Mexíkó. Þá hefur suð­ur­kóreska flug­fé­lagið Eastar Jet kyrr­sett allar 737 MAX átta þotur sín­ar.