„Það veit eng­inn almenni­lega hvernig þetta fer. Staðan er grafal­var­leg. Það er engin leið að líta fram­hjá því að það eru tvær vikur þangað til að þeir eiga að fara út úr Evr­ópu­sam­band­inu. Og það er engin lausn ennþá á því hvernig það mun fara.“

Þetta sagði Eiríkur Berg­­mann Ein­­ar­s­­son, pró­­fessor í stjórn­­­mála­fræði, um stöð­una á Brex­it, útgöngu Breta úr Evr­ópu­sam­band­in­u,í sjón­varps­þætt­inum 21 á Hring­braut í vik­unni. Eiríkur var gestur Þórðar Snæs Júl­í­us­­son­­ar, rit­­stjóra Kjarn­ans, í þætt­in­um. Hægt er að sjá stiklu úr honum hér að neð­an.

Breska þingið hefur tví­vegis hafnað útgöngu­samn­ingi sem Ther­esa May for­sæt­is­ráð­herra lands­ins hefur lagt fyrir það. Auk þess hafn­aði það í vik­unni því að ganga út úr sam­band­inu án samn­ings og að óska eftir frestun á útgöngu, en útgöngu­dagur Breta er settur 29. mars næst­kom­andi.

Eiríkur sagði þetta alveg ótrú­lega stöðu fyrir breska þjóð­þingið að vera í. „Og fyrir bresku þjóð­ina alla og það er óljóst hvernig þeir geta kom­ist út úr þessu.“

Hann sagði flókið að fresta útgöng­unni, sem nú hefur verið sam­þykkt að gera. Það væri til að mynda algjör­lega fárán­legt að fresta henni fram yfir Evr­ópu­þings­kosn­ingar sem fara fram 23 til 26 maí næst­kom­andi. „Þá verða Bretar lögum sam­kvæmt að fara í þá atkvæða­greiðslu og kjósa full­trúa á Evr­ópu­þingið sem eiga að taka þátt í að setja Evr­ópu­sam­band­inu lög og dreifa út fjár­munum þess fyrir næstu fimm árin án þess að verða þar áfram. Það gerir málið mjög erfitt.“

Eiríkur greindi frá því að hann hefði heyrt skemmti­lega kenn­ingu innan úr breska Íhalds­flokkn­um, þar sem menn væru að velta því fyrir sér að Ther­esa May gætti staðið frammi fyrir því að hrein­lega aft­ur­kalla úrsögn­ina. „Þá er málið komið á núll­punkt og hún þyrfti eflaust að segja af sér og boða til nýrra kosn­inga.“