Verð á tunnu af hrá­olíu hefur hækkað mikið á skömmum tíma, eða um 30 pró­sent á síð­ustu tveimur mán­uð­um. Sé horft fjóra mán­uði aftur í tím­ann er hækk­unin rúm­lega 40 pró­sent. 

Verðið á tunn­unni er nú 64 Banda­ríkja­dalir en það var um 42 Banda­ríkja­dalir í byrjun árs­ins. 

Miklar sveiflur hafa ein­kennt heims­markað með olíu und­an­farin miss­eri, en þegar það fór hæst á síð­asta ári, í októ­ber, fór það í 75 Banda­ríkja­dali. Það hrundi síðan niður undir lok árs­ins og var rúm­lega 40 Banda­ríkja­dal­ir, sam­kvæmt mark­aðs­upp­lýs­inga­vef Wall Street Journal.

Þessar miklu sveiflur upp og niður hafa komið fram, meðal ann­ars í kjöl­far yfir­lýs­inga olíu­fram­leiðslu­ríkja um að ýmist draga úr fram­leiðslu eða auka hana. 

Don­ald Trump Banda­ríkja­for­seti hefur kallað eftir því að olíu­fram­leiðslu­ríkin í OPEC sam­tök­un­um, auki fram­leiðslu á olíu til að verðið lækki og haldi þannig verð­bólgu í skefj­u­m. 

Fyrir Ísland getur hröð hækkun olíu skilað sér í auk­inni verð­bólgu, meðal ann­ars vegna hækk­unar á rekstr­ar­kostn­aði fyr­ir­tækja og hækk­unar á fram­leiðslu- og flutn­ings­kostn­að­i. 

Verð­bólga mælist nú 2,9 pró­sent en verð­bólgu­mark­miðið er 2,5 pró­sent. Meg­in­vextir Seðla­banka Íslands eru 4,5 pró­sent. 

Spár grein­enda gera ráð fyrir að verð­bólga muni aukast á næstu miss­erum, meðal ann­ars vegna hækk­andi flug­far­gjalda, að því er fram kemur í nýlegum spá grein­ing­ar­deilda Arion banka og Lands­bank­ans.