Jarð­varmi slhf, félag í eigu 14 íslenska líf­eyr­is­sjóð, hefur keypt hlut Inn­ergex í HS Orku á 299,9 millj­ónir dali, eða 37,3 millj­arða króna á núvirði. Frá þessu er greint í til­kynn­ingu frá Inn­ergex til kanadísku kaup­hall­ar­innar í dag.

Inn­ergex hefur þar með selt sænsku félagið Magma Sweden til Jarð­varma en Magma á 53,9 pró­sent hlut í félag­inu. Með kaup­unum mun Jarð­varmi verða eig­andi allra hluta í HS Orku, eina íslenska orku­fyr­ir­tæk­inu sem er í einka­eigu eftir að hafa gengið inn í sölu á hlut fjár­fest­ing­ar­sjóðs­ins ORK fyrr á þessu ári.

Við­búið er þó að Jarð­varmi selji hluta þess sem félagið hefur keypt til breska félags­ins Ancala Partners, sem sér­hæfir sig í inn­viða­fjár­fest­ingum í Evr­ópu og er að stóru leyti fjár­magnað af breskum líf­eyr­is­sjóð­um. Sam­kvæmt heim­ildum Kjarn­ans stendur til að ljúka þeirri vinnu fyrir lok maí­mán­aðar og er talið lík­legt að um helm­ingur hluta­fjár í HS Orku verði áfram­seldur til  Ancala.

Jarðvami hefur samt sem áður tögl og hagldir í þróun HS Orku að óbreyttu. Þegar félagið keypti sig upp­haf­lega inn í fyr­ir­tækið þá tryggði það sé ríka minni­hluta­vernd og form­lega aðkomu að öllum meiri­háttar ákvörð­unum á vegum HS Orku. Það sam­komu­lag felur því í sér neit­un­ar­vald gagn­vart öllum stórum ákvörð­un­um.

Því neit­un­ar­valdi hefur Jarð­varmi beitt áður, þegar fjár­fest­ing­ar­sjóð­ur­inn Black­stone hugð­ist kaupa 30 pró­sent hlut HS Orku í Bláa lón­inu á 95 millj­ónir evra, um 12,9 millj­arða króna á núvirði, sum­arið 2017. Sú ákvörðun var ekki vin­sæl á meðal stjórn­enda meiri­hluta­eig­enda HS Orku á þeim tíma.

Aðkomu Beaty fer að ljúka

Með söl­unni á Magma Energy Sweden til Jarð­varma lýkur ára­tuga­langri, og um tíma afar umdeildri, aðkomu Kanada­manns­ins Ross Beaty og fyr­ir­tækja sem hann hefur komið að að þessu þriðja stærsta orku­fyr­ir­tæki lands­ins.

Beaty, sem hefur verið stjórn­ar­for­maður HS Orku árum sam­an, leiddi upp­kaup sænska skúffu­fyr­ir­tæk­is­ins Magma Energy Sweden á hlutum í HS Orku á árunum 2009 og 2010. Þrátt fyrir mik­inn póli­tískan mót­þróa, og umræður um hvort ríkið gæti gengið inn í kaupin eða komið í veg fyrir þau á annan hátt, þá náði hann að kaupa alls 98,53 pró­sent hlut í orku­fyr­ir­tæk­inu á alls um 33 millj­arða króna.

Miðað við verð­mið­ann sem er á söl­unni til Jarð­varma þá er heild­ar­virði HS Orku nú um 69 millj­arðar króna. Fyr­ir­tækið hefur því reynst ágætis fjár­fest­ing fyrir þá sem keyptu það á sínum tíma.

Fyr­ir­tæki Beaty fór síðan í gegnum sam­ein­ingar og end­aði undir hatti Inn­ergex, sem gekk frá söl­unni á hlut sínum í HS Orku í dag.