Bára Hall­dórs­dóttir mun eyða svoköll­uðum Klaust­ur­upp­tökum með við­höfn annað kvöld á skemmti­staðnum Gaukn­um, þriðju­dag­inn 4. júní. Frá þessu er greint í við­burði sem kall­ast Bára­móta­brennan á Face­book. Her­leg­heitin hefj­ast upp úr klukkan 21:00.

Greint var frá því í fjöl­miðlum þann 22. maí síð­ast­lið­inn að stjórn Per­sónu­verndar hefði ekki fall­ist á kröfu þing­manna Mið­flokks­ins um að Bára Hall­dórs­dóttir yrði sektuð vegna hljóð­rit­unar hennar á sam­skiptum þeirra sem fram fóru á veit­inga­staðnum Klaustri. Hins vegar tald­ist upp­takan ólög­leg sam­kvæmt per­sónu­vernd­ar­lögum og bæri Báru að eyða henni og senda Per­­són­u­vernd stað­­fest­ingu á að það hefði verið gert eigi síðar en 5. jan­úar næst­kom­and­i.

Sam­kvæmt við­burð­inum á Face­book munu lög­fræð­ingar Báru sjá um að skrá­setja við­burð­inn en Hall­dór Auðar Svans­son, fyrr­ver­andi borg­ar­full­trúi Pírata, mun flytja opn­unará­varp fyrir hönd stuðn­ings­hóps­ins Takk Bára.

Þá verða valdir kaflar upp­tök­unnar kvaddir sér­stak­lega og upp­tökum svo eytt með við­höfn. Í kjöl­farið er fólki frjálst að grípa í míkró­fón­inn, fyrst til að segja eitt­hvað upp­byggi­legt og svo breyt­ist Gauk­ur­inn í alls­herjar kara­oke-partý.