Skúli Mogensen segir Stefán Einar ítrekað hafa farið með „dylgjur og ósannindi“

Stofnandi og forstjóri WOW air fer hörðum orðum um höfund nýrrar bókar um sig og flugfélagið. Hann segist sannfærður um að það hefði verið hægt að bjarga flugfélaginu frá gjaldþroti.

Skúli Mogensen Mynd: Skjáskot/RÚV
Auglýsing

„Ég ætlaði ekki að tjá mig um skrif Stefáns Einar enda ekki svara vert. En því miður get ég ekki lengur orða bundist enda hefur Stefán núna ítrekað farið með dylgjur og ósannindi um málefni WOW air.“

Svona hefst stöðuuppfærsla Skúla Mogensen, stofnanda, eiganda og forstjóra WOW air, sem hann setti á Facebook í dag. Tilefnið var viðtal við Stefán Einar Stefánsson, viðskiptaritstjóra Morgunblaðsins og höfund nýrrar bókar um Skúla og WOW air sem kom nýverið út, í útvarpsþættinum Sprengisandi í morgun.

Auglýsing
Í stöðuuppfærslunni telur Skúli upp nokkur dæmi um það sem hann segir dylgjur eða ósannindi í málflutningi Stefáns Einars. „Stefán Einar hefur áður borið fram alvarlegar ásakanir og rangfærslur í garð WOW air sem áttu ekki við rök að styðjast. Það er ástæðan fyrir því að ég hafði engan áhuga á að ræða við hann um félagið. Alvarlegast var þegar hann fullyrti að WOW air skuldaði Isavia 2 milljarða í stórri forsíðugrein sem Morgunblaðið birti 15. september 2018 þegar við vorum á loka metrunum við að klára umrætt skuldabréfaútboð. Núna liggja fyrir gögn sem sýna svo ekki verður um villst að skuld okkar við Isavia var nær einum milljarði á þessum tíma en ekki tveim milljörðum eins og Stefán Einar fullyrti. Þessi frétt og sú umræða sem skapaðist í framhaldinu hafði mjög neikvæð áhrfi á skuldabréfaútboðið og starfsemi WOW air.“

Kæru vinir Ég ætlaði ekki að tjá mig um skrif Stefáns Einar enda ekki svara vert. En því miður get ég ekki lengur orða...

Posted by Skuli Mogensen on Sunday, June 9, 2019

Tölusettar rangfærslur

Alls telur Skúli til sex atriðin sem hann segir Stefán Einar fara rangt með í bók sinni.

Í fyrsta lagi segir hann það „alfarið rangt að Ben Baldanza hafi komið í stjórn WOW air fyrir tilstuðlan eða þrýsting frá Airbus eða einhverja aðra hagsmunaaðila. Staðreyndin er sú að ég hringdi í Ben skömmu eftir að hann hætti hjá Spirit Airlines og hann kom til Íslands nokkrum dögum seinna og við ákváðum að bjóða honum í stjórn WOW air sem hann þáði. Eina aðkoma Airbus var að ég hringdi í vin minn hjá Airbus sem gaf mér símanúmerið hjá Ben svo að ég gæti haft samband við hann. Að öðru leyti hafði Airbus ekkert með aðkomu Ben að félaginu að gera.“

Í öðru lagi sé það alfarið rangt að Airbus og leigusalar hafi haft miklar áhyggjur af rekstri WOW air um það leyti sem Baldanza kom í stjórn félagsins í byrjun árs 2016. „Á þessum tíma var afkoma og rekstur WOW air mjög góður og kepptust flugvélaframleiðendur og leigusalar að selja/og eða leigja WOW air fleiri flugvélar. WOW air skilaði góðum hagnaði bæði 2015 og 2016 þannig að þessar fullyrðingar standast engan veginn.“

Í þriðja lagi sé það einnig alfarið rangt að Skúli og stjórn WOW air hefðu viljandi hundsað aðvörunarorð annara í flugheiminum. „Það er mjög auðvelt að vera vitur eftir á og eins og við höfum útskýrt þá liggur núna fyrir að við gerðum mikil mistök að færa okkur frá lággjaldastefnunni og að innleiða breiðþoturnar inn í leiðarkerfi okkar. Þetta reyndist dýrkeypt mistök en augljóslega töldum við þær réttar þegar þær voru teknar. Allar stærri ákvarðanir voru ræddar ítrekað á stjórnarfundum félagsins þar með talið flotamál og leiðarkerfi félagsins. Ben tók virkan þátt í þeim umræðum og var oft með gott innlegg í umræðuna en hann skilaði aldrei séráliti um nein málefni félagsins né í neinum ákvörðunum sem teknar voru á stjórnarfundum WOW air.“

Auglýsing
Í fjórða lagi sé það alfarið rangt að helmingurinn af sex milljarða króna skuldabréfaútboði WOW air hafi verið skuldaleiðrétting eða skuldbreyting. „Þetta er rangt og stenst enga skoðun enda hefur ekkert komið fram sem styður þessa fullyrðingu Stefán Einars.“

Óformlegur fundur

Í fimmta lagi segir Skúli að samtal WOW air-manna við Icelandair í byrjun september í fyrra um mögulega sameiningu félaganna, sem greint er frá í bók Stefáns Einars, hafi verið á óformlegum nótum. „Ég hitti fyrst Ómar Benediktsson fyrir tilviljun á flugráðstefnu í London og við spjölluðum saman. Það var ákveðið að við myndum fá okkur kaffi þegar heim var komið með Boga Níls forstjóra Icelandair. Ég og Ragnhildur Geirsdóttir hittum svo Ómar og Boga þar sem við vorum fyrst og fremst að ræða hvort að það væri þess virði að fara í viðræður eða ekki og ef slíkar viðræður ættu að fara fram með hvaða hætti það gæti verið. Það var ákveðið að fara ekki í slíkar viðræður og því fóru aldrei formlegar viðræður í gang og því bar hvorki Icelandair né okkur skylt að upplýsa markaðinn um það á þeim tíma enda engin ástæða til.“

Í sjötta lagi fjallar Skúli um aðkomu Samgöngustofu og annarra opinberra aðila að WOW air á síðustu metrunum í líftíma félagsins. Hann segir að það virðist hafa „gleymst“ í umræðunni að WOW air hafi verið með undirritaðan skilyrtan samning við Indigo Partners um allt að níu milljarða króna fjárfestingu á þessum tíma sem hefði tryggt framtíð WOW air um ókomna tíð. „Við unnum mjög náið með Samgöngustofu og öðrum eftirlitsaðilum við að uppfylla skilyrði samningsins þar með talið að ná samkomulagi við alla skuldabréfaeigendur okkar, sem við gerðum. Ná að endursemja og skila breiðþotunum, sem við gerðum. Við unnum því í góðri trú um að við værum að uppfylla öll skilyrði samningsins og myndum klára endanlegan samning eins og til stóð 28. febrúar 2019. Allt fram að þeim tíma vorum við öll sannfærð um að WOW air myndi lifa áfram. Því miður varð það ekki raunin.“

Sagan verður sögð einn daginn

Skúli segir í lok færslunnar að hann skorist ekki undan ábyrgð sinni á falli WOW air og að hann óski þess sannarlega að hafa gert ýmislegt öðruvísi. Ég er sannfærður að það hefði verið hægt að bjarga WOW air og þeim miklu verðmætum sem þar lágu ekki síst fyrir þjóðarbúið og íslenska neytendur. Það líður vart sá klukkutími að ég hugsi ekki um WOW air, þann frábæra hóp starfsfólks sem gerði WOW að veruleika, farþega okkar og allt sem við vorum búin að byggja upp í sameiningu. Sú saga verður einn daginn sögð.“

WOW air fór í þrot 28. mars síðastliðinn. Áhrifin á íslensks efnahagslíf hafa verið mikil en ásamt loðnubresti er gjaldþrot félagsins helsta ástæða þess að nú er búist við samdrætti í íslenskum þjóðarbúskap í ár í stað áframhaldandi hagvaxtar.

Styrkir þú Kjarnann?

Kjarninn reiðir sig á framlög lesenda. Með því að styrkja Kjarnann mánaðarlega tekur þú þátt í að halda úti öflugum fjölmiðli.

Kjarninn hefur verið til taks fyrir kröfuharða lesendur í sjö ár og býður almenningi upp á vandaða umfjöllun þar sem áhersla er á gæði og dýpt.  

Ef þú ert nú þegar styrkjandi leyfum við okkur að benda á að hægt er að óska eftir að hækka styrkinn með því að senda póst á takk@kjarninn.is


Já takk, ég vil styrkja Kjarnann!
Steinar Frímannsson
Hver er stefna stjórnmálaflokkanna í umhverfismálum?
Kjarninn 16. september 2021
Halldóra Mogensen, þingflokksformaður Pírata, í forystusætinu á RÚV í gærkvöldi.
Boðuð útgjaldaaukning Pírata er ekki fullfjármögnuð
Staðreyndavakt Kjarnans skoðar fullyrðingu Halldóru Mogensen um að kosningaloforð Pírata séu fullfjármögnuð með nýjum tekjuöflunarleiðum.
Kjarninn 16. september 2021
Jón Steindór Valdimarsson
Drifkraftur nýrra lausna í loftslagsmálum
Kjarninn 16. september 2021
Mikil skekkja er í útreikningum Pírata á helstu tekjuöflunarleiðinni sem flokkurinn sá fyrir að fjármagna kosningaloforð sín með.
Tugmilljarða skekkja í útreikningum Pírata á helstu tekjuöflunaraðgerð þeirra
Þingmaður Pírata segir að flokkurinn sé að endurskoða útreikninga sína á áhrifum 3,75 prósentustiga hækkunar efsta þreps tekjuskattskerfisins, eftir að bent var á að þar skeikaði tugmilljörðum.
Kjarninn 16. september 2021
Jóhann S. Bogason
Vesalings Færeyingarnir
Kjarninn 16. september 2021
Kolefnisgjald leggst meðal annars á bensín og dísil olíu.
Meirihluti stjórnmálaflokka vill hækka kolefnisgjald
Passa verður að kolefnisgjald leggist ekki þyngst á þau sem minnst hafa á milli handanna að mati þeirra flokka sem vilja hækka kolefnisgjald. Útblástur frá vegasamgöngum er helsta uppspretta losunar sem er á beinni ábyrgð Íslands.
Kjarninn 16. september 2021
Liðin tíð að Bandaríkin veiti Íslandi aðstoð „vegna góðvildar“
Íslendingar þurfa tromp á hendi til að vekja áhuga Bandaríkjanna til að styðja landið diplómatísk í alþjóðasamfélaginu og veita viðskiptalegar eða efnahagslegar ívilnanir, að því er fram kemur í þættinum Völundarhús utanríkismála Íslands.
Kjarninn 16. september 2021
Völunarhús utanríksmála Íslands
Völunarhús utanríksmála Íslands
Völundarhús utanríkismála Íslands – Þáttur 3: Áhugi Bandaríkjanna á Íslandi
Kjarninn 16. september 2021
Meira úr sama flokkiInnlent