Starfsmönnum forsætisráðuneytisins fjölgaði um 29,5 prósent frá janúar 2016 til apríl 2019. Þetta kemur fram í svari forsætisráðherra, Katrínar Jakobsdóttur, við fyrirspurn Sigmundar Davíðs Gunnlaugssonar um starfsmenn á launaskrá forsætisráðuneytisins.
Í svarinu segir að í janúar árið 2016 hafi 44 starfsmenn verið á launaskrá forsætisráðuneytisins. Í janúar árið 2017 hafi þeir verið 46, 49 í janúar 2018, 54 í janúar 2019 og í apríl 2019 hafi þeir verið 57.
Þó er vert að taka fram að samkvæmt ráðuneytinu endurspegla framangreindar tölur ekki fjölda stöðugilda en misjafnt er á milli ára hve margir starfsmenn eru í hlutastörfum eða í tímabundnum störfum.
Nýlegar breytingar hafa haft mikil áhrif á fjölgun starfsfólks
„Á tímabilinu sem spurt er um hefur skipurit forsætisráðuneytisins tekið nokkrum breytingum, meðal annars í tengslum við breytingar á forsetaúrskurði um skiptingu stjórnarmálefna milli ráðuneyta í Stjórnarráði Íslands og styrkingu á samhæfingarhlutverki ráðuneytisins,“ segir í svari ráðherra.
Þá kemur fram að meðal nýlegra breytinga sem hafi haft umtalsverð áhrif til fjölgunar starfsfólks, samtals um átta starfsmenn, sé annars vegar tilfærsla jafnréttismála til forsætisráðuneytisins í janúar árið 2019 en samfara því hafi fimm starfsmenn flust til ráðuneytisins, auk þess sem skipaður hafi verið skrifstofustjóri yfir nýrri skrifstofu jafnréttismála, og hins vegar flutningur yfirlestrarverkefna vegna stjórnarfrumvarpa, stjórnartillagna og annarra stjórnarskjala frá Alþingi til ráðuneytisins. Við þá breytingu hafi tvö stöðugildi flust til ráðuneytisins frá skrifstofu Alþingis í janúar árið 2018.
Steinunn Valdís Óskarsdóttir, fyrrverandi borgarstjóri Reykjavíkur og þingmaður Samfylkingarinnar á árunum 2007 til 2010, var skipuð í stöðu skrifstofustjóra yfir nýrri skrifstofu jafnréttismála í forsætisráðuneytinu um miðjan febrúar síðastliðinn en Katrín Jakobsdóttir skipaði hana í starfið.
