Stjórn Arion banka hefur ráðið Bene­dikt Gísla­son í starf banka­stjóra. Hann mun hefja störf 1. júlí næst­kom­andi. Bene­dikt var vara­for­maður starfs­hóps stjórn­valda um afnám fjár­magns­hafta á árunum 2013 til 2016 en hóf í kjöl­far þeirra starfa störf hjá Kaup­þingi. Þar sat hann í stjórn á árunum 2016 til 2018. Hann hefur auk þess verið ráð­gjafi Kaup­þings í mál­efnum Arion banka og setið í stjórn bank­ans frá árinu 2018. Bene­dikt er verk­fræð­ingur frá Háskóla Íslands.

Áður hafði Bene­dikt starfað hjá FBA (síðar Íslands­banka), sinnti marg­vís­legum stjórn­un­ar­störfum hjá Straumi-­Burða­r­ás, var fram­kvæmda­stjóri mark­aðsvið­skipta hjá FL Group og fram­kvæmda­stjóri fjár­fest­ing­ar­banka­sviðs MP banka. 

Hann segir Arion banka vera gott fyr­ir­tæki sem gegni mik­il­vægu hlut­verki. „Ég þekki bank­ann vel og hlakka til kynn­ast honum og hans öfl­uga starfs­fólki enn bet­ur. Verk­efnið framundan er að halda áfram að þróa starf­semi og þjón­ustu bank­ans og veita við­skipta­vinum góða og nútíma­lega fjár­mála­þjón­ustu. Arion banki nýtur ákveð­innar sér­stöðu á íslenskum fjár­mála­mark­aði þegar horft er til stóru bank­anna þriggja sem almenn­ings­hluta­fé­lag skráð í kaup­hallir á Íslandi og í Sví­þjóð.“

Brynjólfur Bjarna­son, stjórn­ar­for­maður Arion banka, segir að Bene­dikt hafi mjög skýra sýn á fram­tíð bank­ans og hvernig eigi að mæta þeim áskor­unum sem fjár­mála­fyr­ir­tæki standa frammi fyrir á næstu árum. „Rekstr­ar­um­hverfi fjár­mála­fyr­ir­tækja um allan heim er að breyt­ast hratt, ekki síst með auknu vægi staf­rænnar fjár­mála­þjón­ustu. Það er jafn­framt mik­ill styrkur fyrir Arion banka að fá til for­ystu ein­stak­ling með jafn­mikla reynslu og þekk­ingu og Bene­dikt býr yfir.“

Þótti strax lík­leg­astur

Þann 12. apríl síð­ast­lið­inn var greint frá því að banka­stjóra­skipti væru fyrir dyrum hjá Arion banka. Hösk­uldur H. Ólafs­son, sem hafði gegnt starf­inu í níu ár, væri að hætta. Hösk­uldur hefur síðan neitað því ítrekað að hann hafi verið rek­inn eða að þrýst hafi verið á hann um að hætta. Þrá­látur orðrómur hafði þó verið í gangi und­an­farna mán­uði um að hann yrði ekki mikið lengur í starf­in­u. 

Kjarn­inn fjall­aði ítar­lega um stöðu Arion banka og ýmsar vær­ingar í kringum bank­ann í frétta­skýr­ingu þann 26. apríl síð­ast­lið­inn. Þar kom meðal ann­ars fram að sam­kvæmt heim­ildum Kjarn­ans væri Bene­dikt ofar­lega á blaði yfir næsta banka­stjóra Arion banka. Til þess nyti hann trausts erlendu fjár­fest­inga­sjóð­anna sem eiga enn stóran hlut í bank­an­um. 

Kaup­skil, félag í eigu Kaup­þings, er enn stærsti eig­andi Kaup­þings með 20 pró­sent eign­ar­hlut. Vog­un­­­­ar­­­­sjóð­irn­ir Taconic Capi­tal og Och-Ziff Capital, sem eru á meðal stærstu eig­enda Kaup­þings, eiga einnig 23,28 pró­sent hlut sam­an­lagt. Þar á eftir koma Gildi líf­eyr­is­sjóð­ur  með 4,73 pró­sent eign­ar­hlut og Stoðir hf., sem einu sinni hét FL Group, með 4,63 pró­sent eign­ar­hlut.