Áslaug Hulda Jóns­dótt­ir, for­maður bæj­ar­ráðs Garða­bæj­ar, hefur til­kynnt að hún gefi kost á sér sem rit­ari Sjálf­stæð­is­flokks­ins í rit­ara­kjöri sem fram fer á flokks­ráðs­fund­inum þann 14. sept­em­ber.  Jón Gunn­ars­son, þing­maður Sjálf­stæð­is­flokks, hefur áður til­kynnt um fram­boð í emb­ætt­ið. 

Áslaug Arna Sig­ur­björns­dóttir hefur gegnt emb­ætt­inu und­an­farin tæp fjögur ár en hún var tók við sem dóms­mála­ráð­herra á föstu­dag og má þá ekki lengur vera rit­ari Sjálf­stæð­is­flokks­ins. Því þarf að kjósa nýj­an. 

Áslaug Hulda segir í til­kynn­ingu að hún­ ­trúi því að flokk­ur­inn eigi mikið inni hjá kjós­endum um allt land, en hann hefur verið að mæl­ast með um og rétt yfir 20 pró­sent fylgi í könn­unum und­an­far­ið. „Það er hlut­verk kraft­mik­illar for­ystu flokks­ins að virkja almenni­lega sem flesta flokks­menn til að upp­skera sem mest.”

Hún seg­ist lengi hafa verið þeirrar skoð­unar að það sé nauð­syn­legt að í for­ystu Sjálf­stæð­is­flokks sé full­trúi sveit­ar­stjórn­ar­stigs­ins. „Stórir og mik­il­vægir mála­flokkar eru undir og þá hafa einnig margir af stærstu sigrum flokks­ins unn­ist í ein­stökum sveit­ar­fé­lög­um. Þar liggur okkar sterka gras­rót og að henni þarf að hlúa vel. Ég hef skipað 1. sætið á lista Sjálf­stæð­is­flokks­ins í Garðabæ í síð­ustu þremur sveit­ar­stjórn­ar­kosn­ing­um, þ.m.t. í síð­ustu kosn­ingum þegar flokk­ur­inn land­aði sinni bestu nið­ur­stöðu og fékk 62% fylgi og átta bæj­ar­full­trúa af ell­efu í bæj­ar­stjórn. Það var um leið besta nið­ur­staða Sjálf­stæð­is­flokks­ins á land­inu. Slíkur árangur næst ekki af sjálfu sér í sívax­andi bæj­ar­fé­lagi og ég tel mig hafa margt fram að færa í for­ystu Sjálf­stæð­is­flokks­ins.“ . 

Áslaug Hulda er annar ein­stak­ling­ur­inn sem lýsir form­lega yfir fram­boði í emb­ætt­ið. Jón Gunn­ars­son, þing­maður Sjálf­stæð­is­flokks, reið á vaðið á laug­ar­dag og greindi frá fram­boði sínu á fundi Sjálf­stæð­is­flokks­ins í Kópa­vog­i.