Kol­beinn Ótt­ars­son Proppé, þing­maður Vinstri grænna, segir að allt tal um að taka RÚV af aug­lýs­inga­mark­aði án þess að tryggja þeim tekjur í stað­inn sé í raun tal um að skera starf­sem­ina umfanga­s­mikið niður þar sem aug­lýs­ingar standi undir einum þriðja af tekjum RÚV. Hann vísar þar til ummæla Lilju Alfreðs­dótt­ur, mennta- og menn­ing­ar­mála­ráð­herra, um að hún stefni á leggja fyrir rík­is­stjórn til­lögu um að taka RÚV af aug­lýs­inga­mark­aði.

Vill hækka útvarps­gjald til að bæta upp tapið

Frétta­blaðið greinir frá því í dag að Lilja stefni á að taka Rík­is­út­varpið af aug­lýs­inga­mark­aði en að þær ­fyr­ir­ætl­an­ir hafi ekki verið kynntar rík­is­stjórn­inni með form­legum hætt­i. „Það kemur að því. Ég ligg núna undir feldi og er að skoða hvernig þetta sé best gert. Ég held að umræða um málið sé mik­il­væg og að þetta sé best gert í skref­um,“ segir Lilja um hvenær hún muni kynna fyr­ir­ætl­anir sínir fyrir rík­is­stjórn. 

Katrín Jak­obs­dótt­ir, for­sæt­is­ráð­herra, segir það koma vel til greina að taka RÚV af aug­lýs­inga­mark­aði í sam­tali við Frétta­blað­ið. Hún vill leggja til að það verði skoðað sér­stak­lega hvaða á­hrif það myndi hafa á íslenskan aug­lýs­inga­mark­að. Hvort að þeir rúmir tveir millj­arðar sem Rík­is­út­varpið hafi í tekjur af aug­lýs­inga­sölu muni skipt­ast yfir hina inn­lendur miðl­ana eða fara ann­að. 

Auk þess seg­ist Katrín vilja að RÚV væri bætt aug­lýs­ingatapið með því að hækka útvarps­gjaldið en tekur fram að henni hugn­ist ekki að hafa almanna­fjöl­mið­ill í fjár­lög­um. 

Kurt­eist að ræða fyrst við þing­menn 

Kol­beinn Proppé tjáði sig um fyr­ir­ætl­anir Lilju í Face­book-­færslu í morgun en hann segir að aug­lýs­ingar standa undir einum þriðja af tekjum RÚV og að allt tal um að hætta þeim án þess að tryggja tekjur í stað­inn sé því í raun tal um að skera starf­sem­ina umfangs­mikið nið­ur. 

„Ekk­ert er að finna í stjórn­ar­sátt­mála um þessi mál og spyrja má með atkvæðum hverra ætl­unin sé að ná því fram? Það er sjálf­sagt að ræða stöðu RÚV á aug­lýs­inga­mark­aði, en slík umræða verður að hefj­ast á því hvernig tekjur þess verða tryggð­ar, ekki er ég til umræðu um nið­ur­skurð eða að setja RÚV á fjár­lög,“ segir Kol­beinn. 

Hann segir jafn­framt að það sé sjálf­sögð kurt­eisi að ræða fyrst við sam­starfs­menn áður en þessar fyr­ir­ætl­anir séu boð­aðar opin­ber­lega þar sem atkvæði þing­manna séu jú það sem á end­anum ráð­i.