„Svo verð ég að játa að ég sakna þess að utan­rík­is­ráð­herra hafi ekki haft sam­band við stjórn­völd í Namibíu til að árétta okkar skuld­bind­ingar í eft­ir­fylgni með þró­un­ar­sam­vinnu­verk­efnum okkar þar sem lauk 2010, en líka sam­band við Mala­ví, Úganda, Afganistan og Palest­ínu. Til að engum dylj­ist að Ísland vilji halda áfram að sinna af ein­urð fag­legri og kraft­mik­illi þró­un­ar­sam­vinnu sem hefur gott orð á sér og hefur haft gríð­ar­leg áhrif á líf venju­legs fólks og mögu­leika þess til að byggja sér og sínum góða fram­tíð.“

Þetta segir Rósa Björk Brynj­ólfs­dótt­ir, þing­maður Vinstri grænna, í stöðu­upp­færslu á Face­book í dag.

Þing­mað­ur­inn hitt­i Catherine ­Got­ani Hara, fyrsta kven­for­seta þings­ins í Mala­ví, síð­ast­lið­inn fimmtu­dag en hún heim­sótti Alþingi ásamt föru­neyti, skoð­aði Alþing­is­húsið og átti fund með Stein­grími J. Sig­fús­syni, for­seta Alþing­is, og hitti síðan utan­rík­is­mála­nefnd að máli.

Í færslu sinni á Face­book segir Rósa Björk að Hara hafi lýst á fundi þeirra styrk­leikum og veik­leikum sam­fé­lags­ins í Malaví af mik­illi þekk­ingu og yfir­sýn og hvernig þró­un­ar­sam­vinnu­verk­efni Íslands þar í landi hafi breytt lífi fólks til hins betra.

Mik­il­vægt að Íslend­ingar standi við skuld­bind­ingar sínar

„Sam­starfs­lönd Íslands í þró­un­ar­sam­vinnu eru Malaví og Úganda og áherslu­lönd Íslands í þró­un­ar­sam­vinnu eru Afganistan, Mósam­bík og Palest­ína. Síðan erum við í svoköll­uðu svæða­sam­starfi í Aust­ur-Afr­íku í fiski­málum og mál­efnum hafs­ins og í Vest­ur­-Afr­íku að end­ur­nýj­an­legri orku með áherslu á jarð­hita,“ skrifar Rósa Björk.

Hún segir það vera gríð­ar­lega mik­il­vægt að Íslend­ingar standi við skuld­bind­ingar sínar og auki hlut­fall af þjóð­ar­fram­leiðslu til þró­un­ar­sam­vinnu og tryggi að þeir fjár­munir renni í áhrifa­mikla þró­un­ar­sam­vinnu en ekki í verk­efni hér heima sem eigi að fá pen­inga ann­ars stað­ar.