Arctic Adventures hf. og fram­taks­sjóð­ur­inn Icelandic Tourism Fund I (IT­F) hafa gengið frá sam­komu­lagi um sam­ein­ingu Arctic Adventures og Into the Glacier ehf. Í kjöl­farið verður til stór­fyr­ir­tæki með yfir 400 starfs­menn sem sinnir ferða­tengdri afþr­ey­ingu í öllum lands­hlut­um. Þá er stefnt að því að skrá sam­ein­aða félagið á hluta­bréfa­markað innan tveggja ára. Frá þessu er greint í frétta­til­kynn­ingu frá fyr­ir­tækj­un­um.

Kaupir hlut í fjórum afþrey­ing­ar­fyr­ir­tækjum

Sam­an­lögð velta Into the Glacier og Artic Adventures á árinu 2019 er um 7 millj­arðar króna. Into the Glacier er ferða­þjón­ustu­fyr­ir­tæki sem býður upp á ferðir inn í ísgöngin í Langjökli sem eru stærstu mann­gerðu ísgöng í heimi. Hátt í 60 þús­und manns hafa heim­sótt ísgöngin á árinu.

Artic Adventures er eitt stærsta ferða­þjón­ustu­fyr­ir­tækið á Íslandi þegar kemur að afþrey­ing­ar­tengdri ferða­þjón­ust­u. Á árinu 2019 voru við­skipta­vinir fyr­ir­tæk­is­ins um 250 þús­und. 

Sam­hliða sam­ein­ing­unni kaupir Arctic Adventures hluti ITF í fjórum afþrey­ing­ar­fyr­ir­tækjum í ferða­þjón­ustu: Óbyggða­setri Íslands í Fljóts­dal, Rauf­ar­hóli ehf., Skútu­sigl­ingum ehf. á Ísa­firði og Welcome Enterta­in­ment ehf. 

Í til­kynn­ing­unni segir að kaup­verðið greið­ist með hlutum í Arctic Adventures hf., sem þýði að ITF verður eftir við­skiptin stór hlut­hafi í sam­ein­aða félag­inu. Jafn­framt kemur fram í til­kynn­ing­unni að félögin fjögur verði áfram rekin sjálf­stætt en í nán­u ­sam­starfi við Arct­ic A­dventures. 

Stefna á hluta­bréfa­markað innan tveggja ára 

Iceland­ic Tourism Fund er fram­taks­sjóður rek­inn af Lands­bréf­um, stofn­aður að frum­kvæði Icelandair Group árið 2013. ­Mark­miðið með stofnun sjóðs­ins var að fjár­festa í upp­bygg­ingu afþrey­ing­ar­tengdrar ferða­þjón­ustu á Íslandi.

Helgi Júl­í­us­son, fram­kvæmda­stjóri ITF segir að sam­ein­ingin sé fagn­að­ar­efni fyrir íslenska ferða­þjón­ustu: „Við getum nýtt krafta félag­anna enn bet­ur, náum fram umtals­verðri hag­ræð­ingu og aukum slag­kraft­inn til muna þegar kemur að sölu og mark­aðs­setn­ingu. Arctic Adventures hefur mjög sterka stöðu á mark­aði fyrir afþrey­ing­ar­tengda ferða­þjón­ustu. Sú staða styrk­ist enn frekar í kjöl­far þess­ara við­skipta og getur fyr­ir­tækið nú boðið upp á fyrsta flokks afþr­ey­ingu í öllum lands­hlut­u­m.“

Styrmir Þór Braga­son, for­stjóri Arctic Adventures, segir sam­keppn­is­staða fyr­ir­tæk­is­ins styrk­ist í kjöl­far sam­ein­ing­ar­inn­ar. „Það skiptir mjög miklu að geta boðið ferða­fólki fjöl­breytta afþr­ey­ingu. Við sjáum enn frek­ari tæki­færi til vaxtar á næstu miss­erum og stefnum ótrauð að skrán­ingu á hluta­bréfa­markað innan tveggja ára.“ segir Styrmir Þór.