Meirihluti bæjarstjórnar Ísafjarðarbæjar hefur ákveðið að ráða Birgi Gunnarsson í starf bæjarstjóra Ísafjarðarbæjar. BB.is greinir frá.
Fram kom í fréttum í lok janúar að Guðmundur Gunnarsson hefði látið af störfum sem bæjarstjóri og að ástæða starfsloka væri ólík sýn á verkefni á vettvangi sveitarfélagsins.
Birgir mun hefja störf 1. mars næstkomandi en ráðningin er með fyrirvara um samþykki bæjastjórnar sem kemur næst saman þann 20. febrúar, samkvæmt BB.is.
Birgir er fæddur árið 1963 og er uppalinn á Siglufirði og lauk þaðan grunnskólanámi. Hann er stúdent frá Fjölbrautaskóla NV á Sauðárkróki og rekstrarfræðingur frá Háskólanum á Bifröst. Því til viðbótar lauk hann námi í rekstri og stjórnun frá háskólanum í Gautaborg. Birgir á þrjú börn og er í sambúð með Astrid Boysen sem einnig á þrjú börn.
Birgir var forstjóri Reykjalundar endurhæfingarmiðstöð í Mosfellsbæ þar til í lok síðastliðins árs. Áður var hann forstjóri á Heilbrigðisstofnuninni á Sauðárkróki frá 1991 til 2007. Hann hefur gegnt ýmsum trúnaðarstörfum, til að mynda hefur hann setið í stjórn Norræna heilbrigðisháskólans í Gautaborg, verið formaður Landssambands heilbrigðisstofnana og Félags forstöðumanna heilbrigðisstofnana.
