Kór­óna­veiran hefur haft gríð­ar­leg áhrif á flug­iðnað og ferða­þjón­ustu um allan heim, en hvergi hafa áhrifin verið meiri en í Kína og í öðrum Asíu­ríkj­um. Á sumum stöðum hefur allt að 80 pró­sent sam­dráttur orð­ið, frá því að veiran kom upp í Wuhan í Kína, sam­kvæmt umfjöllun Wall Street Journal. 

Mörg flug­fé­lög í Asíu eru nú sögð leita leiða til að hag­ræða veru­lega í rekstri, með upp­sögnum starfs­fólks og öðrum nauð­syn­legum aðgerð­um. Ef það gengur ekki, eru fjölda­gjald­þrot sögð í kort­un­um. 

Sú dýfa sem flug­iðn­að­ur­inn hefur upp­lifað að und­an­förnu, vegna veirunn­ar, er sú mesta sem sést hefur frá því 11. sept­em­ber 2001, þegar turn­arnir tveir í New York hrundu eftir að far­þega­þotum var flogið á þá í hryðju­verka­árás.

Vísi­tölur hluta­bréfa­mark­aða hafa fallið mikið á und­an­förnum tveimur dög­um, eða um 3 til 6 pró­sent að með­al­tali, sé horft til stöðu stærstu mark­að­ana sér­stak­lega. Í Banda­ríkj­unum féll S&P500 vísi­talan um 3 pró­sent, annan dag­inn í röð. 

Á Íslandi hefur vísi­tala mark­að­ar­ins fallið tvo daga í röð, og hefur meðal ann­ars 20 pró­sent af mark­aðsvirði Icelandair þurrkast út, en það féll um 10,74 pró­sent í dag.

Ótti við að miklar nei­kvæðar efna­hags­legar afleið­ingar vegna kór­óna­veirunn­ar, eigi enn eftir að koma fram, er það sem nefnt er helst sem áhrifa­valdur á mikla nei­kvæðni á mörk­uðum og lækkun á mark­aðsvirði fyr­ir­tækja.