Stjórn­endur Icelandair Group vinna nú að því að finna leiðir til að styrkja fjár­hag félags­ins með því að styrkja hann til lengri tíma. Félagið hefur ráðið Kviku banka, Íslands­banka og Lands­bank­ann sem ráð­gjafa til að hefja skoðun á mögu­legum leiðum til að ná því mark­miði. Þá munu stjórn­endur Icelandair einnig vinna náið með íslenskum stjórn­völdum í því ferli. 

Frá þessu er greint í til­kynn­ingu sem send var til Kaup­hallar Íslands í morg­un. 

Þar segir að að sá heims­far­aldur sem nú geis­ar, og þær ráð­staf­anir sem stjórn­völd hafa gripið til um allan heim til að sporna við útbreiðslu COVID-19 veirunn­ar, hafa haft veru­leg áhrif á flug og ferða­lög. „Á síð­ustu dögum og vikum hefur áhersla verið lögð á það hjá Icelandair að halda uppi lág­marks flug­sam­göngum til og frá land­inu, bæði fyrir far­þega og vöru­flutn­inga þrátt fyrir að flug­á­ætlun félags­ins hafi dreg­ist veru­lega saman á und­an­förnum vik­um. Flug­á­ætlun félags­ins nemur nú minna en 10% af þeirri áætlun sem gefin hafði verið út fyrir þetta tíma­bil árs­ins. Enn ríkir mikil óvissa um hvenær ferða­tak­mörk­unum verði aflétt og eft­ir­spurn eftir flugi og ferða­lögum muni aukast á ný og gera stjórn­endur Icelandair Group ráð fyrir því að flug­á­ætlun félags­ins muni drag­ast saman um að minnsta kosti 25% yfir sum­ar­tím­ann.“

Lausafjárstaða Icelanda­ir, að með­töldum óádregnum lána­lín­um, sé þó enn vel yfir því við­miði sem félagið starfi eftir en stefna þess hefur verið sú að þessi staða fari ekki undir 29 millj­arða króna á núver­andi gengi, eða 200 millj­ónir banda­ríkja­dala, á hverjum tíma. „Eins og til­kynnt hefur verið um, hefur félagið gripið til ýmissa aðgerða til þess að verja lausa­fjár­stöðu sína á und­an­förnum vik­um. Hins veg­ar, ef miðað er við lág­marks­tekju­flæði hjá félag­inu í apríl og maí, er ljóst að lausa­fjár­staða félags­ins muni skerð­ast og fara undir ofan­greint við­mið.“

Bogi Nils Boga­son, for­stjóri Icelandair Group, segir að Icelandair viti að á ein­hverjum tíma­punkti mun flug kom­ast aftur í eðli­legt horf og því vilji félagið vera vel í stakk búin til að sækja fram og nýta þau tæki­færi sem þá verða fyrir hendi. „Til að ná þeirri stöðu er nauð­syn­legt að gera við­eig­andi breyt­ingar á kostn­að­ar­upp­bygg­ingu félags­ins, styrkja fjár­hags­stöðu þess og leita allra leiða til að styrkja sam­keppn­is­hæfi þess til fram­búð­ar.“

Icelandair sagði upp 240 starfs­­mönnum 23. mars síð­ast­lið­inn og til­kynnti að 92 pró­­sent eft­ir­stand­andi starfs­­manna myndu fara í skert starfs­hlut­­fall tíma­bund­ið. Þessi hópur fellur undir úrræði rík­­is­­stjórn­­­ar­innar um mót­fram­lag eftir því sem við á og er því nú á hluta­bót­u­m. 

Upp­­sagn­­irnar náðu til flestra hópa innan félags­­ins en heild­­ar­­fjöldi stöð­u­­gilda hjá Icelandair Group var að með­­al­tali 4.715 á árinu 2019. Þeir starfs­­menn sem eru áfram í fullu starfi lækk­uðu um 20 pró­­sent í laun­­um. Fram­­kvæmda­­stjórar lækk­uðu um 25 pró­­sent og laun for­­stjóra og stjórnar lækk­uðu um 30 pró­­sent.