Skelj­ung­ur, sem setti hluta af starfs­mönnum sínum á hina svoköll­uðu hluta­bóta­leið þrátt fyrir að fyr­ir­tækið hefði greitt hlut­höfum sínum 600 milljón króna arð­greiðslu sex dögum áður, hefur ákveðið að end­ur­greiða Vinnu­mála­stofnun kostnað vegna þeirra starfs­manna sem fengu hluta­bóta­greiðslur í apr­íl. 

Þetta kemur fram í til­kynn­ingu frá for­stjóra Skelj­ungs, Árna Pétur Jóns­syni, í dag. Þar segir enn fremur að „að athug­uðu máli telur Skelj­ungur að ekki hafi verið rétt að nýta úrræð­ið.“

Skeljungur ætlar einnig að bjóða starfs­mönnum sínum sem settir voru á hluta­bóta­leið­ina 100 pró­sent vinnu frá og með 1. maí. Í til­kynn­ing­unni segir að „allir starfs­menn Skelj­ungs hafa nú verið færðir í 100 pró­sent vinnu­hlut­fall og munu því ekki sækja frek­ari bætur til Vinnu­mála­stofn­un­ar.“

Fleiri fyr­ir­tæki hafa annað hvort greitt arð eða keypt eigin bréf, og þannig skilað fjár­munum úr rekstri til hlut­hafa, en samt sem áður sóst eftir úrræðum stjórn­valda. Frétta­blaðið greindi frá því í morgun að Hagar hefðu keypt eigin bréf fyrir 450 millj­ónir króna frá því í lok febr­úar og Össur nýtti hluta­bóta­leið­ina skömmu eftir að hafa greitt eig­endum sínum 1,2 millj­arða í arð.

Katrín Jak­obs­dóttir for­sæt­is­ráð­herra sagði við frétta­stofu RÚV í dag að það hefði að sjálf­sögðu ekki verið ætl­unin „að stöndug fyr­ir­tæki væru að nýta sér þetta neyð­ar­úr­ræði til að greiða niður laun sinna starfs­manna.“

Hún boð­aði að leið­inni yrði breytt til að koma í veg fyrir þetta.