Rík­is­sjóður Ísland gaf í dag út skulda­bréf upp á 500 millj­ónir evra, eða 76 millj­arða króna. Mikil eft­ir­spurn var eftir kaupum á bréfum úr útgáf­unni og alls bár­ust til­boð frá yfir 200 aðilum fyrir 3,4 millj­arða evra í hana, eða tæp­lega sjö sinnum það sem var í boð­i. 

Vegna þess­arar miklu umfram­eft­ir­spurnar tókst að fá betri kjör en upp­haf­lega var stefnt að, nánar til­tekið 0,3 pró­sentu­stigum lægri vexti. Skulda­bréfin sem gefin voru út í dag bera 0,625 pró­sent vexti, eru til sex ára og á ávöxt­un­ar­kröf­unni 0,667 pró­sent.

Í til­kynn­ingu frá fjár­mála- og efna­hags­ráðu­neyt­inu vegna þessa kemur fram að kaup­enda­hóp­ur­inn að skulda­bréf­unum sam­an­standi af seðla­bönkum og öðrum fag­fjár­fest­um, aðal­lega frá Evr­ópu. Umsjón útgáf­unnar var í höndum Citi, JP Morgan og Morgan Stanley.

Bjarni Bene­dikts­son, fjár­mála- og efna­hags­ráð­herra, segir að lán­takan sé stað­fest­ing á greiðum aðgangi rík­is­sjóðs að fjár­magni á alþjóða­mörk­uðum og sýni til­trú fjár­festa á þann við­náms­þrótt sem hafi verið byggður upp á Íslandi á und­an­förnum árum. „Hún eykur getu okkar til að mæta afleið­ingum heims­far­ald­urs kór­ónu­veiru og end­ur­speglar mik­inn styrk og getu til að sigr­ast á efna­hags­legum afleið­ingum hans.“

Hann segir útgáf­una vera í sam­ræmi við stefnu rík­is­sjóðs í lána­mál­um. Hún auð­veldi aðgengi ann­arra inn­lendra aðila að erlendum láns­fjár­mörk­uðum og stað­festi greiðan aðgang rík­is­sjóðs að stórum og fjöl­breyttum hópi fjár­festa. „Mark­aðir hafa verið líf­legir að und­an­förnu enda eru mörg ríki í sömu spor­um, að tryggja sér fjár­magn til lengri tíma.“