Leit að flugi til Fær­eyja á vefnum Dohop hefur rokið upp um 420 pró­sent milli vikna. Skýr­ingin er sú að Fær­ey­ingum tókst snemma að ná góðum tökum á far­aldr­inum og útrýma kór­ónu­veirunni í sam­fé­lag­inu og nú hefur verið ákveðið að opna landa­mærin fyrir ferða­lög til og frá Íslandi um miðjan mán­uð­inn.

„Kæru frænd­ur, nú er rétti tím­inn til að heim­sækja Fær­eyj­ar,“ stendur í skila­boðum frá fær­eyska flug­fé­lag­inu Atl­antic Airways til íslensku þjóð­ar­inn­ar. „Við höfum opnað landa­mæri okkar sér­stak­lega fyrir Íslend­inga.“ Í skila­boð­unum er bent á að félagið muni frá og með 15. júní fljúga milli Kefla­vík­ur­flug­vallar og Fær­eyja þrisvar í viku; á mánu­dög­um, mið­viku­dögum og föstu­dög­um.

Íslend­ingar eru einnig að leita að flugi til ann­arra landa en leit þeirra að flugi inn­an­lands hefur einnig auk­ist um 76 pró­sent á einni viku.

Í grein­ar­gerð sem efna­hags- og fjár­mála­ráðu­neytið vann að beiðni for­sæt­is­ráð­herra um hag­ræn áhrif þess að aflétta ferða­tak­mörk­unum til Íslands kemur m.a. fram að þrátt fyrir að hluti þeirra 200 millj­arða króna sem Íslend­ingar hefðu hugs­an­lega varið erlendis á þessu ári fari í neyslu inn­an­lands er ólík­legt að aukin neysla Íslend­inga hafi grund­valla­r­á­hrif á þróun ferða­þjón­ust­unnar þótt hún geti haft áhrif á ein­staka rekstr­ar­að­ila. Neysla Íslend­inga standi aðeins undir broti af tekjum flestra ferða­þjón­ustu­fyr­ir­tækja, ekki síst hót­ela, bíla­leigu­bíla og þeirra sem veita ýmsa sér­hæfða afþr­ey­ingu. Þá kemur einnig fram að ekki séu heldur vís­bend­ingar um að ferða­lög Íslend­inga inn­an­lands muni aukast mikið á næst­unni, enda dragi atvinnu­leysi og óvissa úr einka­neyslu.

Í maí var ákveðið að ferða­menn frá Fær­eyjum og Græn­landi þurfi ekki að sæta sótt­kví við kom­una til lands­ins. Áhrif þess eru að mati fjár­mála­ráðu­neyt­is­ins hverf­andi en hlut­fall Fær­ey­inga og Græn­lend­inga í heildar gistin­óttum árið 2019 var 0,1 pró­sent fyrir hvora þjóð.

En þegar tak­mark­anir eru á ferða­lögum víða ann­ars staðar í heim­inum gæti fjöldi ferða­manna frá þessum löndum hingað auð­vitað breyst.