„Jú­jú, það er önnur bylgja haf­in. Það segir sig sjálft að við erum með aukn­ingu á til­fell­um. Það er bara smekks­at­riði hvort að menn vilja kalla það nýja bylgju eða ekki. En bara til að klára þessa umræðu, og setja punkt aftan við það, þá getum við sam­mælst um það að þetta er kannski ný bylgja.“

Þetta sagði Þórólfur Guðna­son sótt­varna­læknir á upp­lýs­inga­fundi Almanna­varna sem hófst klukkan 14 í dag þegar hann var spurður að því hvort að önnur bylgja far­ald­urs­ins væri haf­in.

Átta ný inn­­­an­lands­smit af COVID-19 veirunni greindust í gær. Alls var 291 sýni greint á sýkla- og veiru­fræð­i­­­deild Land­­­spít­­­al­ans og voru átta þeirra jákvæð. Af þeim 914 sýnum sem Íslensk erfða­­­grein­ing greindi í gær reynd­ist ekk­ert jákvætt en Íslensk erfða­­­grein­ing hefur verið að mæla fyrir smiti í sam­­­fé­lag­inu frá 29. júlí.

2.035 sýni voru tekin á landa­­­mærum í gær. Beðið er eftir mótefna­­­mæl­ingu í tveimur þeirra. Frá 15. júní þegar sýna­­­taka hófst hafa  68.203 sýni verið tek­in við landa­­mæri.

Staðan í raun óbreytt milli daga

Þórólfur sagði að smitin sem hefðu verið að grein­ast und­an­farna daga tengd­ust annarri af þeim hóp­sýk­ingum sem hefðu verið greind­ar. Virk smit væru nú í öllum lands­hlutum nema á Aust­ur­landi. Lang­flestir þeirra sem eru í sótt­kví eru á höf­uð­borg­ar­svæð­in­u. 

Staðan í dag væri í raun nán­ast óbreytt frá því í gær. Þórólfur sagði að það væri ánægju­legt að sjá hversu fáir væru að grein­ast hjá Íslenskri erfða­grein­ingu sem hóf að skima á ný með handa­hófs­kenndum hætti. Alls hefur fyr­ir­tækið ski­mað 3.374 ein­stak­linga frá 29. júlí en ein­ungis tveir hafa greinst með veiruna. Það renndi stoðum undir að sam­fé­lagsmit væri ekki mjög útbreitt.

Þórólfur sagði að það ætti að sjást árangur af þeim við­bót­ar­að­gerðum sem kynntar voru á föstu­dag, þar sem meðal ann­ars tveggja metra reglan var tekin upp að nýju og sam­komu­tak­mark­anir aftur færðar niður í 100 manns. Þar sem ekki er hægt að tryggja tveggja metra fjar­lægð milli ótengdra ein­stak­linga er svo kraf­ist notk­unar and­lits­grímu sem hylur nef og munn.

Ef þessar aðgerðir myndu ekki skila árangri ætti hins vegar að verða tölu­verð aukn­ing í smit­u­m. 

Tæki­færið er núna

„Staðan í dag, með 80 smit, er eins og hún var 10. mars, og við vitum auð­vitað ekki alveg hvaða stefnu þessi smit taka næstu daga. En nú er tæki­færið til að ráða nið­ur­lögum þess og við verðum að hjálp­ast áfram að,“ sagði Alma D. Möller land­læknir á fund­inum í dag.

Alma sagði að verið væri að nota sömu aðferðir og síð­ast þegar COVID-19 smit blossuðu upp. Í þeim felst meðal ann­ars að slá skjald­borg um hina eldri og við­kvæmu. Síðan væri annað mark­mið að vernda nauð­syn­lega inn­viði, aðal­lega heil­brigð­is­kerf­ið, með því að fletja kúr­f­una. Þá þyrfti að miðla upp­lýs­ing­um, hvetja til sótt­varna og biðla til fólks að sækja smitrakn­ing­arapp­ið.