Fjöldi þeirra sem greinst hefur með virkt smit af kór­ónu­veirunni hér á landi síð­ustu daga er nú orð­inn 91. Slíkur fjöldi hefur ekki verið með COVID-19 hér á landi síðan 30. apríl er til­fellin voru 86. 

Níu ný til­felli greindust í gær. Þá voru  734 manns í sótt­kví en í dag er fjöld­inn kom­inn í 746. Einn sjúk­lingur með COVID-19 hefur legið á sjúkra­húsi síð­ustu daga en sam­kvæmt Covid.is liggur nú eng­inn með sjúk­dóm­inn á sjúkra­húsi. Frá upp­hafi far­ald­urs­ins hafa 1.926 greinst með sjúk­dóm­inn hér á landi.

 „Það er sem stendur óvissa um hvaða stefnu far­ald­ur­inn muni taka,“ sagði Alma Möller land­læknir á upp­lýs­inga­fundi gær­dags­ins. „Hvort að smitum muni fjölga eða hvort okkur tekst öllum í sam­ein­ingu að ná tökum á smit­un­um. Við teljum að við þurfum að læra að lifa með veirunni til lengri tíma og að það sé óhjá­kvæmi­legt að alltaf verði ein­hver smit í gangi. En hins vegar myndum við vilja hafa betri stjórn á aðstæðum akkúrat núna og þess vegna erum við í öllum þessum aðgerð­u­m.“

Alma ítrek­aði að við værum í miklu betri stöðu núna en í vetur til að sinna þeim sem veikj­ast. „Covid-­göngu­deildin heldur vel utan um alla og ef að fólk þarf inn­lögn þá búa læknar og annað heil­brigð­is­starfs­fólk yfir nauð­syn­legri þekk­ingu, reynslu, lyfjum og tækja­bún­að­i.“