Von­brigði. Áfall. Erfið staða. Þungar frétt­ir.

Upp­lýs­inga­fundur almanna­varna og land­læknis í dag var með öðrum brag en hann hefur verið lengi. Til­kynnt var að einn lægi nú á gjör­gæslu­deild og í önd­un­ar­vél vegna COVID-19. Sá er ung­ur, aðeins á fer­tugs­aldri. 

Þessar þungu fréttir voru okkur færðar eftir að ítrekað hefur komið fram á síð­ustu fundum að veik­indi væru ekki mjög alvar­leg þrátt fyrir fjölgun smita. Sótt­varna­læknir segir nú ekk­ert benda til þess að veiran sé að veikj­ast eins og velt hafði verið upp á fyrri upp­lýs­inga­fund­um. Skýr­ingin á minni veik­indum í upp­hafi þess­arar bylgju far­ald­urs­ins væri lík­lega sú að ungt fólk er í meiri­hluta þeirra sem greinst hafa með COVID-19. Reynslan hefur sýnt að hann leggst harðar á eldra fólk og þá sem eru með und­ir­liggj­andi sjúk­dóma.

„Það er aldrei hægt að leggja of mikla áherslu á það að í þess­ari bar­áttu er veiran óvin­ur­inn,“ sagði Víðir Reyn­is­son, yfir­lög­reglu­þjónn almanna­varna­deildar rík­is­lög­reglu­stjóra, á fund­in­um. „Það er auð­vitað mikið sjokk að grein­ast [með COVID-19], að fá þetta sím­tal frá rakn­ing­arteym­inu og COVID-­göngu­deild­inni. Og síðan fyrir aðra að fá sím­tal um að vera í sótt­kví.“

Hann sagði „kannski of snemmt“ að segja til um hvort að það verði mikil og útbreidd veik­indi. „En þetta breyt­ist hratt. Við sjáum það í dag. Það er stutt síðan við fengum fréttir af þess­ari inn­lögn á Land­spít­al­ann. Við sáum þetta ger­ast í mars. Við sáum þetta ger­ast hér á Íslandi. Við sjáum þetta ger­ast í útlönd­um. Það eina sem er alveg öruggt í þessu er að ef að veiran er að dreifa sér þá munum við fá meira af alvar­legum veik­ind­um. Og við munum sjá fleiri ein­stak­linga leggj­ast inn á spít­ala.“

Hann sagði að nú væri mik­il­vægt að beita dóm­greind­inni og vera var­kár. Að sýna til­lits­semi og taka ábyrgð. „Við höfum áður talað um mik­il­vægi þess að verja við­kvæmu hópana. Og þeir sem umgang­ast slíka hópa þurfa að vanda sig sér­stak­lega. Það á við okkur sem eigum aldr­aða for­eldra eða ömmur og afa sem við þurfum að huga að.“

Veiran er að smit­ast úti í sam­fé­lag­inu, sagði Víð­ir. „Við vitum það að mikið návígi, jafn­vel lítil partí, geta verið upp­runi að alvar­legum smit­um. Við viljum hitta fólk, maður er manns gam­an, en á svona stundum og á svona tímum er mik­il­vægt að eiga það inni og skapa öðru­vísi minn­ing­ar. [...] Þetta er erfið staða og þungar fréttir sem við erum að færa í dag. En við höfum sýnt það áður og við ætlum að sýna það aftur að við getum tek­ist á við hvað sem er ef við stöndum sam­an.“

Hann sagði okkur hafa lært ýmis­legt í vetur og að nú værum við að læra enn fleira. „Við getum öll gert aðeins bet­ur, ef allir leggja sig örlítið betur fram þá náum við góðum árangri.“

Hans loka­orð á þessum fundi voru: „Við höfum sagt það áður og ég segi það aft­ur: Þetta verk­efni er ALGJÖR­LEGA í okkar hönd­um.“