Álfheiður Ágústsdóttir, sem gegnt hefur starfi framkvæmdastjóra fjármála og innkaupa hjá Elkem Ísland undanfarin ár, hefur tekið við starfi forstjóra kísilmálmverksmiðjunnar á Grundartanga. Þetta kemur fram í tilkynnningu frá Elkem.
Þar segir einnig að fráfarandi forstjóri, Einar Þorsteinsson, hafi af persónulegum ástæðum óskað eftir að draga úr vinnuframlagi sínu og ábyrgðum en muni taka sér stöðu við hlið nýráðins forstjóra sem ráðgjafi á sviði orkumála og vinnumarkaðar.
Álfheiður þekkir starfsemi verksmiðjunnar vel, en hún hóf þar störf sem sumarstarfsmaður árið 2006, fyrst í framleiðslu og síðar á fjármálasviði. Hún hefur verið í fullu starfi hjá fyrirtækinu frá árinu 2009. Í upphafi sinnti hún ýmsum störfum hjá Elkem samhliða námi sínu í reikningshaldi og endurskoðun. Hún segir verkefnin framundan bæði spennandi og krefjandi.
„Ég þekki okkar frábæra starfsfólk og grunnþætti verksmiðjunnar vel eftir öll þessi ár hér á Grundartanga. Þekkingin og samheldnin sem hér er til staðar er öflugt hreyfiafl og það er mikill heiður að fá að leiða þennan stórkostlega hóp áfram til góðra verka á tímum sem krefjast örra breytinga og aðlögunar. Ég er viss um að saman muni okkur takast að leggja grunn að farsælu starfi í góðri sátt við bæði umhverfi okkar og viðskiptavini til langrar framtíðar.
Í þeim efnum mun áframhaldandi nærvera og þekking forvera míns vafalaust skipta miklu máli og ég vil nota þessi tímamót til þess að þakka Einari Þorsteinssyni fyrir sitt mikla framlag til starfseminnar hér um langt árabil,“ er haft eftir Álfheiði í fréttatilkynningu.
