„Svona eiga þing­menn ekki að tala,“ skrifar Ragna Sig­urð­ar­dótt­ir, borg­ar­full­trúi Sam­fylk­ingar og for­maður Ungra jafn­að­ar­manna á Twitter í dag og vísar þar til ummæla sem Ágúst Ólafur Ágústs­son, þing­maður flokks­ins, lét falla í við­tals­þætt­inum Sprengisandi um helg­ina. Sagði hann núver­andi rík­is­stjórn vera rík­is­stjórn Bjarna Bene­dikts­son­ar. Þessu tóku margir sem kven­fyr­ir­litn­ingu þar sem kona, Katrín Jak­obs­dótt­ir, væri for­sæt­is­ráð­herra Íslands.

Þegar Krist­ján Krist­jáns­son þátta­stjórn­andi benti á að rík­is­stjórnir væru vana­lega kenndar við for­sæt­is­ráð­herra, í þessu til­viki Katrínu Jak­obs­dótt­ur, þá sagði Ágúst Ólaf­ur: „Við Willum [Þór Þórs­son, þing­maður Fram­sókn­ar­flokks­ins, sem var líka gestur þátt­ar­ins] þekkjum alveg hver stjórn­ar. Og það er ekki Katrín.“

Ágúst Ólafur var í kjöl­farið ásak­aður um að sýna af sér kven­fyr­ir­litn­ingu með orðum sín­um. Á meðal þeirra sem það gerðu var Svan­dís Svav­ars­dóttir heil­brigð­is­ráð­herra sem skrif­aði í stöðu­upp­færslu á Twitter í morg­un, þar sem hún hlekkj­aði í þráð Líf Magneu­dótt­ur, borg­ar­full­trúa Vinstri grænna, um mál­ið: „Botn­laus kven­fyr­ir­litn­ing. Og ekki í fyrsta sinn.“

Líf hafði sjálf skrif­að: „Ágúst Ólaf­ur, finndu þér eitt­hvað annað að gera. Þú átt ekk­ert erindi á ALþingi jafn illa hald­inn af kven­fyr­ir­litn­ingu og raun ber vitni. Þetta er ekki í fyrsta sinn.“

Á meðal þeirra sem tjáðu sig á þræði Lífar var Kristín Soffía Jóns­dótt­ir, borg­ar­full­trúi Sam­fylk­ing­ar­inn­ar, sem skrif­aði: „Úff þetta er bara ekki í lag­i...“

Ágúst Ólafur baðst í dag afsök­unar á ummælum sínum með færslu á Face­book að honum þyki leitt að hafa sett orð sín fram með þeim hætti að hann gerði lítið úr for­ystu­hlut­verki Katrínar Jak­obs­dótt­ur.

Ragna skrifar í færslu sinni á Twitter að gott og gilt sé að biðj­ast afsök­unar en að ummælin minni „óneit­an­lega á þá kyn­ferð­is­legu áreitni sem þing­mað­ur­inn sýndi af sér og léleg við­brögð hans í kjöl­far opin­ber­unar henn­ar“. Hún bætir svo við: „Allt þetta hlýtur að hafa áhrif á stöðu hans fyrir næstu alþing­is­kosn­ing­ar.“