Albertína Friðbjörg Elíasdóttir, þingmaður Samfylkingarinnar í Norðausturkjördæmi, hefur tekið þá ákvörðun að gefa ekki kost á sér fyrir næstu alþingiskosningar. Frá þessu greinir hún á Facebook í kvöld.
Segir hún það hafa verið mikil forréttindi að sitja á þingi fyrir Samfylkinguna þetta kjörtímabil sem nú er að renna sitt skeið. Síðustu vikur og mánuði hafi hún verið að velta fyrir sér framhaldinu.
„Ég hafði hug á að halda áfram en nú er ég í þeirri stöðu að líf mitt og okkar hjónanna mun breytast verulega í vor en við eigum von á okkar fyrsta barni,“ skrifar hún.
Tekur Albertína fram að þingstörfin séu að mörgu leyti virkilega gefandi og skemmtileg og hafi henni þótt ómetanlegt að vera fulltrúi Norðausturkjördæmis á þingi. Raunveruleikinn sé samt sem áður sá að starfið krefjist mikils og sé ekkert sérstaklega fjölskylduvænt. Þá sakni hún þess alltaf að geta ekki verið meira á Akureyri.
„Eftir mikla umhugsun hef ég því komist að þeirri niðurstöðu að mig langar að veita nýja verkefninu alla mína athygli næstu mánuðina og hef ég því tekið þá ákvörðun að gefa ekki kost á mér til að taka sæti ofarlega á lista Samfylkingarinnar fyrir næstu Alþingiskosningar.
Þetta er ekki auðveld ákvörðun en ég held hún sé sú eina rétta fyrir mig og fjölskylduna á þessum tíma. Ég óska auðvitað félögum mínum í Samfylkingunni alls hins besta og mun áfram leggja mitt að mörkum til að Samfylkingin nái góðum árangri í kosningunum í haust, enda trúi ég því að jafnaðarstefnan sé lykillinn að þeim samfélagslegu áskorunum sem við stöndum frammi fyrir í dag,“ skrifar hún.
