„Að tengja veru­legar breyt­ingar á stjórn­ar­skrá lands­ins við kosn­ingar á for­seta lýð­veld­is­ins er and­stætt lýð­ræð­is­legu eðli beggja verk­efn­anna,“ sagði Ólafur Ragnar Gríms­son, for­seti Íslands, við setn­ingu Alþingis í dag. Hann sagði einnig að teng­ing þess­ara tveggja kosn­inga væri „­jafn­vel and­lýð­ræð­is­leg í eðli sín­u.“

Það ­sé ­nauð­syn­legt að stjórn­skipan lands­ins sé ekki í upp­námi þegar þjóðin velur for­seta að vori, en slíkt upp­nám gæti verið vegna óvissu um ákvæði sem beint eða óbeint breyta valdi og sessi for­set­ans.

Þá sagði hann Íslend­inga ekki svo fátæka að ekki væri hægt að halda tvennar kosn­ing­ar, „sjálf­stæðan rétt til að ákveða nýskipun stjórn­ar­skrár og kjósa sér­stak­lega for­seta lýð­veld­is­ins, hver fái vald hans og ábyrgð í hend­ur.“

Hann var­aði við því að breyt­ingar á stjórn­ar­skránni yrðu gerðar á skömmum tíma og til þeirra yrði spar­að.

„Sé það hins vegar ætlun þings­ins að fara nú að hreyfa við þessum horn­steini í stjórn­ar­skrá lýð­veld­is­ins, ber að vanda vel þá veg­ferð, gaum­gæfa orða­lag og allar hliðar máls­ins; efna til víð­tækrar umræðu meðal þjóð­ar­innar um afleið­ingar slíkrar breyt­ing­ar, umræðu í sam­ræmi við lýð­ræðiskröfur okkar tíma og þá þakk­ar­skuld sem við eigum að gjalda kynslóð­unum sem í hund­rað ár helg­uðu full­veld­is­rétt­inum krafta sína,“ sagði Ólafur Ragn­ar.

Hann tal­aði einnig um ákvæði um þjóð­ar­at­kvæða­greiðsl­ur, og segir það vanda­verk að velja orða­lag. „Einkum þegar ljóst er að ágrein­ingur er bæði innan þings og utan um hve langt eigi að ganga, hve víð­tækur rétt­ur­inn til að krefj­ast þjóð­ar­at­kvæða­greiðslu um ein­stök lög eigi að vera sem og hve afdrátt­ar­laust eign­ar­réttur þjóð­ar­innar á auð­lindum verði skil­greindur í stjórn­ar­skrá“.