Sam­þykkt var á hlut­hafa­fundi Icelandair Group síð­degis í dag að auka hlutafé í félag­inu og gefa út áskrift­ar­rétt­indi í tengslum við sam­komu­lag sem félagið gerði nýverið við banda­ríska fjár­fest­inga­sjóð­inn Bain Capi­tal um að kaupa nýja hluti í félag­inu fyrir um 8,1 millj­arð króna.

Með þess­ari sam­þykkt er það stað­fest að Bain Capi­tal verður stærsti eig­andi Icelandair Group, með 16,6 pró­sent hlut. Matt­hew Evans kemur inn í stjórn Icelandair Group fyrir hönd sjóðs­ins, en Úlfar Stein­dórs­son víkur úr stjórn­inni eins og hann hafði sagst ætla að gera, yrði fall­ist á til­lög­urn­ar.

Guð­mundur Haf­steins­son verður stjórn­ar­for­maður og Nina Jons­son verður vara­for­maður stjórnar Icelandair Group, sam­kvæmt til­kynn­ingu frá félag­inu.

Bain Capital, sem var meðal ann­ars stofnað af fyrr­ver­andi for­seta­fram­bjóð­and­anum og núver­andi öldund­ar­deild­ar­þing­mann­inum Mitt Rom­ney, fær áskrift­ar­rétt­indi fyrir hlutum sem sam­svara 25 pró­sent af heild­ar­fjölda þeirra nýju hluta sem gefnir verða út. Bain Capi­tal á eign­ar­safn sem er metið á um 130 millj­arða Banda­ríkja­dala.

Þessi heim­ild gildir í tíu daga frá og með birt­ingu upp­gjörs Icelandair Group fyrir annan árs­fjórð­ung, sem birt var á fimmtu­dag. „Áskrift­ar­rétt­indin veita Bain heim­ild, en ekki skyldu, til kaupa á nýjum almennum hlutum í félag­inu á sama gengi á hvern hlut að við­bættum 15 pró­sent árs­vöxt­u­m,“ sagði í til­kynn­ingu félags­ins til Kaup­hallar Íslands fyrir um mán­uði síð­an.

Sóttu síð­ast nýtt hlutafé í sept­em­ber í fyrra

Þetta er í annað sinn á skömmum tíma sem Icelandair Group fer í hluta­fjár­aukn­ingu. Félagið safn­aði alls 23 millj­örðum króna í útboði sem fór fram í sept­em­ber í fyrra, en það hefur átt í miklum rekstr­ar­vanda um ára­bil sem jókst veru­lega þegar kór­ónu­veiru­far­ald­ur­inn skall á í fyrra­vor. Fjöldi hlut­hafa fór yfir ell­efu þús­und eftir útboðið og því ljóst að fjöl­margir ein­stak­lingar keyptu fyrir litlar fjár­hæðir í því.

Alls nam tap Icelandair Group um 45 millj­­örðum króna á fyrri hluta árs­ins 2020. Stærstan hluta þess taps, sem nemur 245 millj­­ónum króna á dag, má rekja beint til kór­ón­u­veiru­far­ald­­ur­s­ins.

Fyrir lá að félagið átti ekki nægt laust fé til að lifa mikið lengur við óbreyttar aðstæð­ur. Tap Icelandair á árinu 2020 í heild var 51 millj­arður króna og á fyrri helm­ingi árs­ins 2021 tap­aði félagið tæpum 10,9 millj­örðum króna.

Flug­fé­lagið sækir sér nú meira hlutafé og hefur vænt­ingar um að flug­á­ætlun félags­ins árið 2022 verði um 80 pró­sent af því sem hún var árið 2019.