Vott­orð um bólu­setn­ingu gegn COVID-19 og vott­orð um fyrri sýk­ingu verða tekin gild á landa­mæri Íslands, óháð því hvort þau koma frá löndum innan Evr­ópska efna­hags­svæð­is­ins (EES) eða ekki. Þetta kemur fram í nýrri frétta­til­kynn­ingu frá heil­brigð­is­ráðu­neyt­inu.

Sam­kvæmt til­kynn­ing­unni þurfa ein­stak­lingar sem fram­vísa vott­orð um bólu­setn­ingu eða fyrri sýk­ingu, sem upp­fylla kröfur sótt­varn­ar­lækn­is, hvorki að fara í sýna­töku eða sótt­kví né fram­vísa vott­orði um nei­kvætt PCR-­próf á landa­mær­un­um.

Hingað til hafa bólu­set­ing­ar­vott­orð, sem gefin hafa verið út í ríkjum innan Evr­ópska efna­hags­svæð­is­ins með ein­hverju þeirra bólu­efna sem hlotið hafa mark­aðs­leyfi Evr­ópu, verið tekin gild á landa­mærum Íslands. Einnig hafa skír­teini á vegum Alþjóða­heil­brigð­is­mála­stofn­un­ar­innar (WHO) verið tekin gild, að því gefnu að WHO hafi fjallað um og við­ur­kennt bólu­efnið sem skráð er í skír­tein­ið. Sömu­leiðis hafa vott­orð um afstaðna COVID-19 sýk­ingu sem upp­fylla skil­yrði sótt­varn­ar­læknis verið tekin gild.

Heil­brigð­is­ráðu­neytið segir að ákvörðun ráð­herra um að taka gild öll vott­orð sem upp­fylla sömu kröf­ur, óháð upp­runa, gerir þeim sem bólu­settir hafa verið í Banda­ríkj­unum og Bret­landi kleift að fram­vísa vott­orði sem und­an­þiggur þá frá aðgerðum á landa­mær­un­um.