Utan­rík­is­ráðu­neyti Bret­lands brýnir fyrir Bretum í Túnis að yfir­gefa landið undir eins þar sem „mjög miklar lík­ur“ séu á að fleiri hryðju­verka­árásir séu yfir­vof­andi. Frétta­mið­ill­inn Sky­News greinir frá mál­inu.

Búið er að fjölga flug­ferðum frá land­inu og tvær breskar ferða­skrif­stofur stað­settar í Túnis hafa ákveðið að senda starfs­fólk sitt aftur til Bret­lands.

Breska utan­rík­is­ráðu­neytið segir að breskir ferða­menn eigi að yfir­gefa landið nema þeir þurfi nauð­syn­lega að dvelja þar. Þá er brýnt fyrir fólki að ferð­ast alls ekki til Túnis nema bráð nayðsyn krefji.

Talið er að hátt í fjögur þús­und Bretar séu í sum­ar­leyfi í Tún­is.

Þann 26. júní síð­ast­lið­inn voru 38 ferða­menn, þar af þrjá­tíu Bret­ar, drepnir af byssu­manni á bað­strönd og við hótel í Port El Kanta­noui, skammt frá Sous­se. Herská sam­tök súnníta í Sádi Arab­íu, sem eru tengd Íslamska rík­in­u, lýstu yfir ábyrgð á voða­verk­inu.

Í til­kynn­ingu frá breska utan­rík­is­ráðu­neyt­inu segir að vís­bend­ingar um að fleiri hryðju­verka­árásir séu yfir­vof­andi í Tún­is. Það hafi rann­sókn yfir­valda í land­inu leitt í ljós og hættan hafi auk­ist hratt á síð­ustu dög­um.

„Fleiri hryðju­verka­árásir eru mjög lík­leg­ar, meðal ann­ars á ferða­manna­stöð­um, af hálfu ein­stak­linga sem eru í sam­bandi við hryðju­verka­sam­tök í gegnum sam­fé­lags­miðla. Nú er mik­il­vægt að vera á varð­bergi og fara að leið­bein­ingum yfir­valda í Túnis og ferða­skrif­stof­unnar þinn­ar, ef þú ert á vegum slíkrar,“ sagði Phillip Hamm­ond utan­rík­is­ráð­herra Bret­lands í sjón­varps­ávarpi í dag. „Eftir síð­ustu árás í Sousse hafa upp­lýs­ingar okkar gefið til kynna að myndin hafi versnað til muna, þannig að við teljum nú að líkur á fleiri hryðju­verka­árásum séu mjög mikl­ar.“