Breytilegir óverðtryggðir vextir upp í 4,15 prósent hjá Íslandsbanka

Allir stóru bankarnir þrír hafa nú tilkynnt um vaxtabreytingar eftir síðustu vaxtahækkun Seðlabankans. Íslandsbanki var síðastur til að tilkynna breytingar og hækkar breytilega vexti minna en bæði Landsbankinn og Arion banki gerðu í vikunni.

Arnar Þór Ingólfsson 26. nóvember 2021

Íslandsbanki var síðastur stóru bankanna þriggja til að tilkynna um vaxtabreytingar.

Íslandsbanki tilkynnti í dag breytingar á vöxtum bankans í kjölfar vaxtaákvörðunar Seðlabankans. Allir stóru viðskiptabankarnir þrír hafa nú tilkynnt um vaxtabreytingar í kjölfar 0,5 prósentustiga hækkunar á meginvöxtum Seðlabankans.

Breytilegir vextir óverðtryggðra húsnæðislána hjá Íslandsbanka hækka um 0,20 prósentustig og verða þegar þessar breytingar hafa tekið gildi 4,15 prósent. Fastir vextir óverðtryggðra húsnæðislána til 3 ára hækka einnig um 0,20 prósentustig, en fastir vextir slíkra lána til 5 ára haldast óbreyttir í 5,5 prósentum.

Minni hækkun breytilegra vaxta hjá Íslandsbanka

Arion banki og Landsbankinn tilkynntu um vaxtahækkanir fyrr í vikunni. Bankarnir tveir hækkuðu breytilega vexti óverðtryggðra húsnæðislána meira en Íslandsbanki gerir nú, eða um 0,4 og 0,35 prósentustig.

Þessir vextir hjá Arion banka verða 4,29 prósent og hjá Landsbankanum 4,20 prósent, en verða sem áður segir 4,15 prósent hjá Íslandsbanka, sem var síðastur stóru bankanna til að kynna vaxtabreytingar sínar.

Íslandsbanki tilkynnir einnig í dag að fastir vextir verðtryggðra húsnæðislána með vaxtaendurskoðun komi til með að lækka um 0,45 prósentustig um mánaðamótin.

Hækkar útgjöld heimila strax

Ljóst er að þessi hækkun á vöxtum stóru bankanna mun bíta í buddu landsmanna. Stóru bankarnir þrír hafa sópað til sín íbúðalánum frá síðasta vori samhliða því að húsnæðisverð hefur hækkað skarpt og upphæðir lána samhliða hækkað mikið. Hlutdeild banka í útistandandi íbúðalánum er nú um 70 prósent en var 55 prósent í byrjun árs 2020.

Á sama tíma og þessi þróun hefur átt sér stað hefur orðið eðlisbreyting á lántökum landsmanna við það að hlutfall óverðtryggðra lána af öllum íbúðalánum hefur hækkað gríðarlega. Það var 27,5 prósent í byrjun árs 2020 en er nú komið yfir 50 prósent.

Hagnaður stóru bankanna þriggja: Landsbankans, Íslandsbanka og Arion banka var 60 milljarðar króna á fyrstu níu mánuðum ársins. Það er meiri hagnaður en þeir hafa skilað innan heils árs frá 2015. Hagnaðurinn er drifinn áfram af vaxtatekjum, aðallega vegna íbúðalána, og hærri þóknanatekjum. Vaxtamunur stóru bankanna, sem er umtalsvert hærri en í samanburðarlöndum, hefur haldist tiltölulega stöðugur þrátt fyrir að bankaskattur hafi verið lækkaður umtalsvert.

Lífeyrissjóðirnir með bestu kjörin

Sem stendur bjóða lífeyrissjóðir upp á hagstæðustu óverðtryggðu íbúðalánin. Það gæti þó breyst í nánustu framtíð þegar næstu ákvarðanir um vaxtatöflu lána þeirra verða teknar.

Gildi, þriðji stærsti lífeyrissjóður landsins, býður bestu óverðtryggðu kjörin sem stendur, 3,45 prósent vexti, og Brú lífeyrissjóður býður upp á 3,8 prósent vexti.

Lífeyrissjóður verzlunarmanna, næst stærsti lífeyrissjóður landsins, ákvað í síðasta mánuði að stofna nýjan lánaflokk sjóðsfélagalána og lánar nú óverðtryggð lán til íbúðarkaupa með breytilegum vöxtum. Vextir hans eru nú 3,85 prósent.

Við þurfum á þínu framlagi að halda

Þú getur tekið beinan þátt í að halda úti öflugum fjölmiðli.

Við sem vinnum á ritstjórn Kjarnans viljum hvetja þig til að vera með okkur í liði og leggja okkar góða fjölmiðli til mánaðarlegt framlag svo við getum haldið áfram að vinna fyrir lesendur, fyrir fólkið í landinu.

Kjarninn varð níu ára í sumar. Þegar hann hóf að taka við frjálsum framlögum þá varð slagorðið „Frjáls fjölmiðill fyrir andvirði kaffibolla“ til og lesendur voru hvattir til að leggja fram í það minnsta upphæð eins kaffibolla á mánuði.

Mikið vatn hefur runnið til sjávar á þeim níu árum sem Kjarninn hefur lifað. Í huga okkar á Kjarnanum hefur þörfin fyrir fjölmiðla sem veita raunverulegt aðhald og taka hlutverk sitt alvarlega aukist til muna.

Við trúum því að Kjarninn skipti máli fyrir samfélagið.

Við trúum því að sjálfstæð og vönduð blaðamennska skipti máli.

Ef þú trúir því sama þá endilega hugsaðu hvort Kjarninn er ekki allavega nokkurra kaffibolla virði á mánuði.

Vertu með okkur í liði. Þitt framlag skiptir máli.

Ritstjórn Kjarnans: Sunna Ósk Logadóttir, Þórður Snær Júlíusson, Erla María Markúsdóttir, Arnar Þór Ingólfsson, Eyrún Magnúsdóttir og Grétar Þór Sigurðsson.

Já takk, ég vil styrkja Kjarnann!

Orðafjöldi: 495 Færslan var síðast uppfærð: 26. nóvember 2021, kl. 17:45
Færslan birtist fyrst: 26. nóvember 2021, kl. 11:45

Fréttinni og fyrirsögn hennar hefur verið breytt til þess að leiðrétta þann misreikning blaðamanns að breytilegu óverðtryggðu vextirnir hjá Íslandsbanka yrðu slétt 4 prósent eftir að þessi breyting kæmi til framkvæmda. Það er ekki rétt. Misskilningurinn byggðist á því að síðasta vaxtahækkun bankans, upp á 0,15 prósentustig, hefur ekki enn komið til framkvæmda samkvæmt vaxtatöflu bankans, en tekur gildi 1. desember. Þann 1. janúar tekur svo sú vaxtahækkun sem tilkynnt var í dag gildi og verða vextir því komnir upp í 4,15 prósent. Lesendur eru beðnir velvirðingar á þessum mistökum.