Veð­bankar hafa verið mjög góðir í að spá fyrir um hvaða laga­hópur lendir í þremur efstu sæt­unum í Eurovision, söngvakeppni evr­ópskra sjón­varps­stöðva. Því sé ekki séns að Daði Freyr og Gagna­magnið komi til með að vinna keppn­ina fyrir Íslands hönd í ár, þar sem honum er spáð sjötta sæt­ið.

Þetta skrifar Eiríkur Ragn­ars­son, hag­fræð­ing­ur, í grein sinni í nýjasta tölu­blaði Vís­bend­ingar sem kom út í gær. Í henni eru vinn­ings­líkur allra kepp­enda í Eurovision sam­kvæmt veð­bönkum bornar saman við árangur þeirra síð­ustu fimm skiptin sem keppnin hefur verið hald­in.

Sam­kvæmt sam­an­burði Eiríks eru veð­bank­arnir ekk­ert sér­stak­lega góðir í að spá nákvæm­lega fyrir um vinn­ings­sæt­ið, auk þess sem þeir eru mjög lélegir í að spá fyrir um sæta­röð­ina hjá öllum kepp­end­un­um. Hins vegar séu þeir mjög góðir að spá fyrir um það hvaða hópur lendi í fyrstu þremur sætum keppn­inn­ar.

Eiríkur segir það ekki hafa áður ger­st, miðað við hans gögn, að lag utan fyrstu þriggja sæta veð­bank­anna hafi unnið Eurovision. „Sem þýðir að við getum hætt að láta okkur dreyma og notið þess að horfa á keppn­ina vit­andi það að Daði á ekki séns,“ bætir hann við.

Hægt er að ger­ast áskrif­andi að Vís­bend­ingu með því að smella hér