Meira en 50 manns eru látnir eftir tvær gríð­ar­lega stórar spreng­ingar í iðn­að­ar­hverfi í borg­inni Tianjin í Kína í gær. Meðal þeirra látnu eru 12 slökkiliðs­menn. Að minnsta kosti 700 eru slas­aðir þar af 71 alvar­lega, að sögn borg­ar­yf­ir­valda í Tianj­in. Slökkvi­liðið í Tianjin sakna enn 18 slökkvi­liðs­manna.

Spreng­ing­arnar voru svo stórar að þær sáust á gervi­tungla­myndum og þær sendu högg­bylgju um alla borg­ina svo rúður brotn­uðu í húsum í margra kíló­metra rad­í­us. Mynd­bönd af spreng­ing­unum sem gengu um netheima í nótt sýna risa­stóra eld­hnetti við spreng­ing­arn­ar. Þær voru jafn­framt nógu öfl­ugar til að mæl­ast á jarð­skjálfta­mæl­um, að sögn jarð­vís­inda­stof­unar Banda­ríkj­anna.

Fjöl­margir eru slas­aðir eftir spreng­ing­arnar og eldana í Tianj­in. Margir urðu fyrir gler­brotum úr rúðum sem splundr­uð­ust við högg spreng­ing­anna. (Mynd: EPA)

Tianjin er fjórða stærsta borg Kína en þar er stærsta mann­gerða höfn í Kína, fimmta stærsta í heimi sé miðað við umfang þess sem þar fer í gegn. Spreng­ingin varð á geymslu­svæði hafn­ar­innar og flugu flutn­ingagámar um eins og eld­spítu­stokk­ar, nýir bílar á leið til vænt­an­legra kaup­enda brunnu og geymslu­rými brunnu til kaldra kola. Meðal þess sem hefur orðið eld­inum og spreng­ing­unum að bráð eru sprengi­efni, ýmis­konar eit­ur­efni og annað hættu­legt heilsu fólks.

„Ég hélt fyrst að þetta hefði verið jarð­skjálft­i,“ sagði Guan Xiang, sem býr sjö kíló­metrum frá spreng­ing­unum í Tianj­in. Hann sagð­ist svo hafa séð sveppa­ský stíga til him­ins fyrir ofan eld­tung­urnar og spurt sig hvort kjarn­orku­sprengja hafi sprung­ið. Stærð fyrstu spreng­ing­ar­innar var á við þrjú tonn af TNT en sú seinni mun stærri eða á við 21 tonn af TNT.

Gríð­ar­legt magn nýrra bíla sem biðu flutn­ings um allan heim brunnu til kaldra kola á hafn­ar­bakk­anum í Tianjin eftir spreng­ing­arn­ar. (Mynd: EPA)

Orsök spreng­ing­anna er talin vera eldur sem varð í nokkrum flutn­ingagámum, að sögn frétta­stof­unnar Xin­hua. Hins vegar er ekki hægt að full­yrða um orsök­ina. Í kjöl­far spreng­ing­anna hafa eldar læst sig í mann­virki og vörur á mun stærra svæði. Vegna þess hversu hratt vörur fara í gegnum svæðið er erfitt að áætla hvar mesta hættan er. Þá er einnig hættu­legt að nálg­ast eldana vegna sprengi­hættu. Slökkvi­liðs­menn berj­ast enn við elda á fjórum stöðum við höfn­ina í Tianj­in.

Slys í tengslum við aukna fram­leiðslu og vöru­flutn­inga Kín­verja hafa orðið æ oftar und­an­farin ár, í takt við gríð­ar­lega hraðan vöxt kíversks efna­hags­lífs.

Gríð­ar­leg eyði­legg­ing