Framsóknarflokkurinn hefur boðið Samfylkingu, Pírötum og Viðreisn til formlegra viðræðna um myndun meirihluta í Borgarstjórn Reykjavíkur. Þetta kemur fram í tilkynningu sem Einar Þorsteinsson, oddviti flokksins, sendi frá sér rétt í þessu. Þar er auk þess boðað til blaðamannafundar í Grósku kl. 11:00 í dag þar sem oddvitar flokkanna verða tilbúnir að svara spurningum fjölmiðla.
Þórdís Lóa Þórhallsdóttir, oddviti Viðreisnar, gaf út tilkynningu á sunnudag þar sem hún sagði það alveg kýrt að flokkur hennar sé í bandalagi með Pírötum og Samfylkingunni hvað varðar meirihlutaviðræður í kjölfar borgarstjórnarkosninganna og að flokkurinn ætli ekki að leita annað. Bandalagið sé augljós kostur þegar málefnaáherslur Viðreisnar í kosningabaráttunni séu skoðaðar, sérstaklega hvað varðar skipulags-, samgöngu- og loftslagsmál. Viðreisn vilji láta reyna á að bandalagið hefji meirihlutaviðræður við Framsóknarflokkinn, en slíkur meirihluti hefði tæplega 56 prósent atkvæða á bakvið sig og 13 af 23 borgarfulltrúum.
Í Morgunútvarpi Rásar 2 í gærmorgun bætti Þórdís Lóa við að þótt meirihlutinn hafi fallið í síðustu kosningum, mætti segja að minnihlutinn hafi líka gert það. Stjórnarflokkarnir hafi tapað tveimur mönnum en stjórnarandstöðuflokkarnir þremur. „Það er ekki verið að kjósa þá, þeir falla meira en meirihlutinn og þegar við tökum þetta inn þá hugsa ég; hvað er það sem að borgarbúar voru að kjósa? Þeir voru að kjósa nýtt afl sannarlega en þeir voru að kjósa eftir stórum línum.“
Einar Þorsteinsson boðaði bakland sitt á fund í gærkvöldi þar sem það sem virðist vera eini möguleikinn í stöðunni sem stendur var ræddur: meirihluti með Samfylkingu, Pírötum og Viðreisn. Heimildir Kjarnans herma að Framsókn muni gera þá kröfu að Einar verði borgarstjóri allt kjörtímabilið ef af samstarfinu verði.
Sagði „þrjóskubandalag“ stunda klækjastjórnmál
Hildur Björnsdóttir, oddviti Sjálfstæðisflokksins í Reykjavík, brást við tíðindunum í gær með því að setja stöðuuppfærslu á Facebook. Þar sagði hún að það sem komið hafi upp úr kjörkössunum í kosningunum fyrir rúmri viku síðan hafi verið skýrt ákall á breytt stjórnmál. Að hennar mati voru niðurstöðurnar skýrar. Sitjandi meirihluti féll og þeir flokkar sem stóðu utan hans fengu nálægt 60 prósent atkvæða.
Án Viðreisnar á Sjálfstæðisflokkurinn ekki leið í meirihluta en Samfylkingin, Píratar og Sósíalistaflokkurinn hafa allir útilokað samstarf við flokkinn og Vinstri græn hafa gefið það út að þau muni ekki setjast í meirihluta eftir að hafa beðið afhroð í síðustu kosningum. Án Viðreisnar getur Sjálfstæðisflokkurinn einungis náð ellefu borgarfulltrúum með samstarfi við Framsókn og Flokk fólksins, sem dugir ekki í meirihluta.
Hildur er þó ekki sammála því mati Einars Þorsteinssonar að Framsókn standi einungis frammi fyrir einum möguleika. Í stöðuuppfærslu sinni sagði hún að það þurfi enginn að undirgangast þær þvinganir sem bandalagið bjóði upp á að hennar mati. „Það eru margir möguleikar á borðinu við myndun meirihluta. Ekki síst ef flokkarnir velja að svara ákalli kjósenda eftir málefnalegum stjórnmálum og aukinni samvinnu um mikilvæg framfaramál. Sjálfstæðisflokkurinn er reiðubúinn til samtals við alla flokka um verkefni næsta kjörtímabils. Við gengum óbundin til kosninga, boðuðum breytingar og vorum heiðarleg gagnvart okkar kjósendum. Nú reynir á Framsóknarflokkinn – og auðvitað alla flokka innan borgarstjórnar - að hafa hugrekkið til að svara kröfu kjósenda um breytt stjórnmál.“
Einar sagði í fréttum Stöðvar 2 í gærkvöldi að hann skildi vel að Hildur væri súr yfir því að nokkrir flokkar hefðu útilokað samstarf við Sjálfstæðisflokkinn. „Hún þarf kannski bara að horfast í augu við það og finna út úr því hvers vegna það er.“.
