Google hefur ráð­ist mestu útlits­breyt­ingar á vörum sínum frá stofn­un. Í dag breytti fyr­ir­tækið merki sínu og eru það mestu breyt­ingar á merk­inu frá stofnun fyr­ir­tæk­is­ins árið 1998. Nýja merkið skartar nýju stein­skrift­ar­letri og kemur í stað hins hefð­bunda merkis sem studd­ist við antíkvu.

Breyt­ing­arnar koma í kjöl­far þess að nafni fyr­ir­tæk­is­ins sem rekur Google var breytt í Alp­habet til að aðgreina leit­ar­vél­ina frá miklu víð­tæk­ari starf­semi fyr­ir­tæk­is­ins. Kjarn­inn greindi frá nafna­breyt­ing­unni í ágúst. Stofn­endur Goog­le, þeir Larry Page og Sergey Brin, segj­ast vona að breytt skipu­lag gefi þeim frelsi til að sækja fram í tækninýj­ung­um.

Page útskýrir Alp­habet sem sam­an­safn fyr­ir­tækja. Þeirra stærst verður Google með leit­ar­vél­ina, Maps kort­ið, Android stýri­kerf­ið, Youtube og fleira inn­an­borðs. Þá verður tækni­þró­un­ar­fé­lagið X Lab rekið sem sér­stök ein­ing undir Alp­habet en félagið hefur til þessa kall­ast Google X og meðal ann­ars þróað sjálf­keyr­andi bíla. Í póst­inum til­tekur Page sér­stak­lega þróun X Lab á drón­um. Fjár­fest­inga­sjóð­irnir Venture og Capi­tal verða reknir sem sér­stök dótt­ur­fé­lög Alp­habet.

Gamla merkið og það nýja.

Nýja let­ur­gerðin hefur verið kölluð Prod­uct Sans og, sam­kvæmt til­kynn­ingu frá Goog­le, byggir á hug­myndum úr barna­skóla­bókum en heldur hlut­leysi sínu. Nýja merkið er heldur ekki lengur föst mynd heldur er hún hreyf­an­leg í takt við nútíma vef­þró­un. Not­endur þjón­ustu Google munu á næst­unni sjá útlit appa, vef­síða og merkja breyt­ast í takt við þetta.